Националниот џез оркестар го донесе страствениот звук на биг бендот и магијата на фадо-звукот на „Сплитско лето“
Под ѕвезденото небо над Сплит, на древниот Перистил, вечерта на 30 јули, Националниот џез оркестар, заедно со извонредната Марија Мендеш и под диригентската палка на маестро Владимир Николов, создаде музичко доживување што допре до срцата на сите присутни.
Просторот, исполнет до последно место, одекнуваше во ритамот на современиот џез, вешто испреплетен со таинствената длабочина и меланхоличната убавина на португалското фадо – звук што допира до најинтимните слоеви на душата.
Овој настан беше дел од програмата на престижниот фестивал „Сплитско лето“, а како што пренесува Далматински портал, концертот „на бројните жители на Сплит им подари музичко доживување во кое се спојуваат страствениот звук на биг бендот и магијата на џезот испреплетена со ноти од фадо“, оставајќи длабок впечаток кај публиката.
„Искрено благодариме на прекрасната публика во Сплит за топлиот пречек, вниманието и аплаузите што ја обележаа оваа незаборавна вечер“, велат од Оркестарот.