Моќниот Доминик Камингс го напушти кабинетот на Борис Џонсон

Доминик Камингс, главен советник на премиерот на Велика Британија, Борис Џонсон, го напушти Даунинг стрит побрзо отколку што се очекуваше, според лице запознаено со операциите во канцеларијата.

После разговорот со премиерот во петокот околу пладне, беше одлучено дека најдобриот план за враќање на смиреноста на секојдневните активности на Даунинг стрит е Камингс да замине веднаш, наместо на крајот на годината, како што беше предложено во четвртокот. Тој ќе продолжи да биде вработен за време на периодот на примопредавање.

Камингс беше фотографиран како го напушта Даунинг стрит носејќи кутија во петокот, а Би-би-си објави дека неговото заминување било донесено со оглед на „вознемиреноста во тимот“ во Даунинг стрит.

Доцна во четвртокот, политичката уредничка на Би-би-си, Лора Куенсберг објави на Твитер дека Камингс ќе го напушти Даунинг стрит до Божик.

Ова доаѓа по тешката недела за Камингс, откако клучниот сојузник и долгогодишен соработник на Џонсон, Ли Каин, исто така поднесе оставка. Број 10 е зафатен со расправа за тоа кој ќе стане следниот шеф на кабинетот на премиерот. На Каин, наводно, првично му била понудена работата, предизвикувајќи непосредна реакција од министрите и владините соработници кои сметале дека тоа е обид за грабнување на власта од страна на фракцијата за „Брегзит“ околу Џонсон.

И Камингс и Каин беа клучни фигури во кампањата за заминување од ЕУ во 2016 година и беа главна оска на Џонсон откако тој стана премиер во јули 2019 година.