МНТ и Интернационалниот универзитет „Еуропа Прима“ потпишаа Меморандум за соработка
Македонскиот народен театар и Интернационалниот универзитет „Еуропа Прима“ – Скопје, денеска, потпишаа Меморандум за соработка со кој на студентите од Универзитетот ќе им се овозможи учество во тековните проекти на МНТ, како дел од нивната практична работа, соопштија од МНТ.
Како што се наведува во соопштението, Меморандум за соработка е потпишан во согласност со изразената желба на двете институции за развивување партнерски односи, како и подобра соработка во областа на културата.
На денешната средба меѓу директорот на Македонски народен театар, Никола Кимовски, и Ректорот на факултетот на Интернационалниот универзитет „Еуропа Прима“ – Скопје, Александар Трајковски, во просториите на МНТ, се потпиша Меморандум за соработка меѓу двете институции.
– Во согласност со изразената желба на двете институции за развивање партнерски односи, дефинирање на конкретни програмски активности, како и подобра соработка во областа на културата, се овозможува учеството на студентите од Универзитетот (како дел од нивната практична работа), за време на студиите во тековните проекти во МНТ. Користење на просторниот капацитет на МНТ за подготовка и одржување на магистерски и дипломски испити, следење на претставите од тековниот репертоар на МНТ, од страна на студентите на Универзитетот, без финансиска надомест, како и користење на просторните и технички ресурси на Универзитетот за потребите на МНТ, стои во соопштението.
Меморандумот, додаваат, претставува основа за долготрајно партнерство препознавајќи го значењето на размена, едукација и промоција на младите таленти како основа за понатамошен развој на културата и уметноста во државата.
– Согласно Меморандумот за соработка, на 6 февруари со почеток во 19:00 часот, на малата сцена, се одигра претставата „Еволуцијата на распадот“ по „Отело“ на В. Шекспир во класа по актерска игра и театарска режија на проф. Дејан Пројковски. Режисер на претставата е Дамјан Димовски, а како композитор се потпишува Дарко Спировски. Во „Еволуцијата на распадот“ играат: Илин Јовановски – Јаго, Тодор Стојковски – Касио, Бранко Михајлоски – Отело, Ѓорѓе Нешковиќ – Родриго, Леонида Гулевска – Дездемона и Илина Чонкова – Емилија, додаваат од МНТ.