Млад, а голем во свирењето: Басистот Иван Кукиќ е новата музичка ѕвезда
Иван Кукиќ, по години млад (26), по свирење голем. Со Влатко Стефановски трио, како басист, отсвири околу 137 концерти дома и во странство, а уште скромен, и секогаш насмеан. Има звучно презиме, а и личи на татко му, музичарот Горан Кукиќ. Мајка му, пак, пејачката Ленче Кукиќ е горда на својот единец кој тргна по различен музички пат, од нивниот. Од родната Струмица, па неколку години на релација Скопје-Белград, заради студиите по музичка продукција и дизајн на звук во Белград, каде дипломираше пред една година. Чудо од дете. Свири гитара, тапани, пијано, контрабас и народни инструменти, компонира, аранжира и пее.
Неговиот талент го препозна и најголемата музичка регионална дискографска куќа- Кроација рекордс од Загреб, која му го објави деби-албумот, „Sunday Vibes“. Денес, во опуштена атмосфера, во Скопје, со пријатели и медиуми, гостите ги почувствуваа саботните вибрации на талентот на Кукиќ и неговиот струмички бенд, кои ги претставија песните во соработка со балканските ѕвезди на мал акустичен концерт.
На промоцијата присуствуваше Иван Бечковиќ од „Кроација рекордс Македонија“, новата ѕвезда ја претстави познатиот музички менаџер Владимир Мандичевски- Манде, кој во оваа пригода го спомна Дадо Топиќ кој чул дека Влатко има„некој клинец кој убива на бас“, а на промоцијата на Кукиќ му дојде и Влатко Стефановски на кого му се обраќаше со маестро.
Албумот има десет песни, од кои две се веќе промовирани како синглови: „Балада за една љубов“ и „Друмови“. Куќиќ со својот бенд на промоцијата ги отсвири најинтересните – „Sunday Vibes“ која со Влатко ја свири со поинаков аранжман на албумот, „Добар и лош“, песната „Пружам руке две“ со живата легенда Дадо Топиќ, „Мјузик филозофи“ со бугарскиот кавалџија Теодосиј Спасов, како и „Друмови“. На албумот ја има и песната во соработка и со групата „Јупитер“- „Лајф он Јупитер“, „Зрно наде“ со грчкиот блуз и рок гитарист Сакис Доволис, и синглот „Балкан фанк“ , снимен со Џамбо Агушев и Јан Стефановски.
Л. Сабит