Министерството за енергетика, рударство и минерални суровини и Царинската управа потпишаа меморандум за соработка


 Министерството за енергетика, рударство и минерални суровини (МЕРМС) и Царинската управа потпишаа Меморандум за соработка, со кој се зајакнува координацијата и размената на податоци за постапките на извоз и увоз на минерални суровини, нафтени деривати, биомаса и други енергенси. Оваа соработка ќе овозможи подобра контрола и ефикасно следење на транспортот на овие ресурси, во согласност со важечките закони и регулативи, соопшти МЕРМС.

Меморандумот го потпишаа министерката за енергетика, рударство и минерални суровини, Сања Божиновска и директорот на Царинската управа, Бобан Николовски. Овој документ предвидува редовна размена на податоци на секои три месеци, како и комуникација по потреба со цел навремено информирање за извозно-увозните постапки и можни неправилности.

– Со овој Меморандум го зајакнуваме институционалниот капацитет за надзор и контрола во секторот на енергетиката и рударството. Транспарентноста во извозно-увозните постапки е клучна за економската стабилност и правната сигурност, а ова партнерство со Царинската управа ни овозможува поголема ефикасност и координација, изјави министерката Божиновска.

Со новиот механизам за следење и размена на податоци, се очекува да се зајакнат контролите врз концесионерите и субјектите кои вршат енергетска дејност, како и да се спречи можноста за нелегални активности во оваа област. Дополнително, ќе се воспостави постојан систем на известување меѓу двете институции, со цел да се обезбеди почитување на законските процедури и прописи.

– Размената на информации и зајакнатата соработка е клучна во борбата за целосно сузбивање на криминалот, поголема заштита на општеството и повисока наплата на приходи во Буџетот. На овој начин вршиме сеопфатен пристап со цел спречување на секој обид за криминал при увоз и извоз на енергетски и минерални ресурси, вели директорот на Царинска управа, Бобан Николовски.

Министерството за енергетика, рударство и минерални суровини, како што се наведува во соопштението, останува посветено на унапредување на регулаторната рамка во енергетскиот сектор и засилување на меѓуинституционалната соработка за поголема транспарентност и одговорност.