Мигранти минуваат низ Унгарија, а Орбан ја обвинува ЕУ за неуспешна контрола на границите

Унгарскиот премиер Виктор Орбан тврди дека ја „брани Европа од бранот мигранти“.

Сепак, пакувањата од  чоколатца и шишиња вода оставени околу изгорениот камперски оган на границата со соседна Словачка сугерираат дека неговото фалење со „унгарскиот како единствен успешен модел“ не е сосема оправдано.

Повеќето соседни земји на ЕУ повторно воспоставија гранични контроли со Унгарија, бидејќи бројот на мигранти кои минуваат низ земјата нагло се зголеми.

За оваа исклучителна мерка се одлучија Словачка и Словенија во последните 10 дена.

Само во септември словачките власти регистрирале 13 илјади мигранти, повеќе отколку во цела 2022 година.

Во унгарското погранично село Хонту, комуналната службеничка Викторија Теконос за АФП изјави дека локалните жители „се држат настрана“ од мигрантите, иако тие брзаат кон границата штом шверцерите ќе ги симнат.

„Некои луѓе повеќе не поминуваат време во близина на реката или во шумата бидејќи се плашат да не сретнат мигранти“, додаде таа.

Толку многу луѓе почнаа да ја преминуваат границата во последниве месеци што Чаба, Словакот кој волонтира за баратели на азил да се регистрираат на другата страна на границата, беше наречен „овчар-мигрант“.

Сепак, повеќето од нив сакаат да продолжат „во Германија бидејќи нивното семејство и пријателите се веќе таму“, вели Катарина Левчикова од словачкото хуманитарно здружение Марина.

Некои словачки политичари, вклучително и унгарското национално малцинство, ја обвинија Будимпешта дека намерно им дозволува на мигрантите да ја преминат границата.

Ослободување на шверцерите
На почетокот на оваа година, Унгарија го навлече гневот на Австрија и огорченоста на Европската комисија кога властите одлучија да ги ослободат осудените шверцери кои не се нивни државјани за да „заштедат пари“.

Повеќе од 1.500 досега се ослободени со обврска да ја напуштат земјата во рок од три дена, според најновите податоци од Унгарскиот национален затворски систем, со кои располага АФП.

Од ЕУ, никој не проверува дали навистина шверцерите ја напуштиле државата во дадениот рок.

Сепак, Орбан не престанува да „се чука во гради“ за наводната строгост на границата, сè уште алудирајќи на бодликавата жица подигната на јужната граница на земјата во екот на мигрантската криза во 2015 година, што придонесе да биде речиси невозможно бегалците да бараат азил.

Само десет лица добија статус на бегалци во Унгарија минатата година, поради што Будимпешта доби опомена од највисокиот суд на ЕУ.

„Подигнавме и физичка и правна ограда за да ја задржиме терористичката закана, која миграцијата нужно ја носи со себе, подалеку од Унгарија“, рече Орбан неодамна во радио обраќање.

Критичарите го обвинуваат дека игра двојна игра дозволувајќи минување низ неговата земја додека ја обвинува ЕУ дека не ја контролира миграцијата.

Германија се најде под голем притисок со 250.000 барања за азил во првите осум месеци од оваа година, повеќе отколку во целата минатата година.

Се враќаат за една недела
„Во интерес на владата е да им олесни на барателите на азил да минуваат низ Унгарија“, вели Рудолф Беркеш, аналитичар од тинк-тенкот „Политички капитал“ во Будимпешта.

„Имено, тој може да ги користи како алатка во преговорите со ЕУ“, додава Беркеш, „или на изборите во Словачка, на кои победи сојузникот на Орбан, Роберт Фицо, кој оттогаш успешно ги затвори коалициските преговори и формираше влада.

Освен што споделуваат антиимигрантски и исламофобични ставови, и Орбан и Фицо одржуваат односи со рускиот претседател Владимир Путин и одбиваат да испратат воена помош за Украина.

И на северната граница на Унгарија со Словачка, мигрантите не престануваат да се слеваат.

Шефот на Дрегелипаланка, Дејвид Риго, не гледа крај.

Повторените обиди на Унгарија да ги врати мигрантите во Србија, иако Европскиот суд на правдата го оцени тоа незаконски во 2020 година, не вродуваат со плод, тврди тој.

„Се случува луѓето кои се фатени и однесени на јужната граница да се вратат за една недела“, рече тој.