Мицкоски со раширени раце за Филипче, ако треба „ќе го прими и на полноќ“

Премиерот Христијан Мицкоски е подготвен да го прими  лидерот на СДСМ, Венко Филипче, во кое било време – доколку навистина има план за подобрување на состојбите во државата и сака да помогне.

„Стојам на располагање во секое време, ќе го прераспределам мојот распоред, ако треба на полноќ, по полноќ, за да го сослушам неговиот план и да видиме дали по тој план нешто може да се реши. Но, доколку планот опфаќа „Стабри пристап“ како што беше во минатото за време на короната, тогаш јас такви планови не можам да прифатам“,изјави премиерот одговарајќи на новинарски прашања.

Мицкоски смета дека е непристојно за ова да разговараат преку медиумите зашто, како што рече, ова е сериозна тема, а за сериозна тема се седнува и се разговара очи во очи.

„Доколку има план подготвен сум да го примам на средба претседателот на СДСМ, да го образложи планот, да го слушнам планот. Сериозни времиња се, јас сум сериозен човек, сериозни работи се во прашање и најмалку што треба да се прави е естрада на јавна сцена“, додаде Мицкоски.

Лидерот на СДСМ, Венко Филипче, претходно денеска ги објави темите кои би биле во фокусот на лидерската средба која тој ја иницира неодамна. Тој смета дека најпрво треба да оствари тет-а-тет средба со премиерот Христијан Мицкоски бидејќи, како што рече, прв одговорил дека средбата е прифатлива, а подоцна би дошла предвид и средба со лидерите на парламентарните партии.