Мицкоски ќе оди во Вашингтон во време на инаугурацијата на Трамп
Премиерот Христијан Мицкоски најави дека на 18 јануари заминува за САД, што се совпаѓа со инаугурацијата на новоизбраниот американски претседател, Доналд Трамп, која ќе се случи на 20 јануари. Во интервјуто за МИА, Мицкоски вели дека во Вашингтон ќе побара поддршка од стратешкиот партнер за евроинтеграциите. Тој вели дека биле предвидени многу средби и разговори со водечките луѓе од администрацијата во Вашингтон.
Но, не е јасно со која администрација. Оваа на Џо Бајден тогаш ќе биде во целосно заминување, додека таа на Трамп треба да се формира, а номинираните министри мора да поминат низ процес на конфирмација во Сенатот. Низ тој процес треба да поминат и врвните дипломати во Стејт Департментот. Единствениот висок функционер во кругот на Трамп кому не му е потребна конфирмација во Сенатот е идниот советник за национална безбедност Мајкл Волц.
За патувањето во Вашингтон Мицкоски рече:
„Покрај Брисел, Вашингтон е исклучително значајно место за нас како држава и за нас како Влада. Навистина ќе имам квалитетни средби од тоа што е досега договорено со водечките луѓе од администрацијата во Вашингтон и очекувам да го привлечам вниманието и со поинаква оптика да гледаат кон Балканот. Мораме прво регионално да го привлечеме вниманието, односно оптиката на Вашингтон да гледа кај нас како регион, не како единка во тој регион. Ако го гледаме Балканот како целина, како регион, тогаш низ оптиката на Вашингтон поубаво можеме да ги гледаме работите и сакам сето тоа да го презентирам таму кои се предностите коишто ние како мала, убава земја во срцето на Балканот ги нудиме, но и кои се предизвиците за регионот“.
Дополнително беше објавено дека за време на престојот во Вашингтон македонскиот премиер ќе се сретне со Хауард Лутник, копретседавач на тимот за транзиција на претседателот Доналд Трамп и министер за трговија, Девин Нунес, претседавач со советодавното тело за разузнавање на претседателот Доналд Трамп и извршен директор на Трамп медиумската корпорација и со извршниот директор на Рамбл, Крис Павловски. Можни се и средби со Ричард Гренел, пратеник за специјални мисии на претседателот на САД, со државниот секретар Марко Рубио и со Илон Маск, кој е назначен за шеф на Министерството за владина ефикасност.