Мицкоски и Филипче денеска во исто време во Крива Паланка. Само на две различни страни

Невообичаено е, но двајцата први политичари во Македонија денеска ќе се најдат во истиот град во исто време, но изгледа на две различни локации. Сето тоа е дел од кампањата за локалните избори, која уште не е официјално почната.

Премиерот Христијан Мицкоски во 12 часот ќе „врши увид“ на изградбата на обиколницата во Крива Паланка. Во најавата од Владата не се наведува дали на овој увид ќе биде и градоначалникот Сашко Митовски, кој е од СДСМ. И дали е поканет.

Се претпоставува дека нема да биде, затоа што во истото време градоначалникот треба да биде домаќин на лидерот на СДСМ, Венко Филипче. Предвидено е Филипче, заедно со него, да даде изјава во поинаков амбиент – пред манастирот Свети Јоаким Осоговски.

Крива Паланка е едно од важните бојни полиња за лакалните избори. ВМРО-ДПМНЕ прави сѐ да го освои градот (една од алатките беше и поднесувањето на кривичната пријава од страна на МВР за градоначалникот Митовски за бениген случај). Од друга страна, Митовски има добро досие со раководењето на градот. Крива Паланка важи за еден од најчистите градови во Македонија.