Масар Омерагиќ избран за нов претседател на ФФМ

На денешното вонредно изборно собрание во хотелот „Хилтон“ во Скопје, официјално Масар Омерагиќ е избран за нов претседател на Фудбалската федерација на Македонија.

Како единствен кандидат на денешното Собрание, Омерагиќ ја доби довербата од сите присутни делегати со акламација.

„На ова Собрание јас сум единствен кандидат на претседателската функција, но тоа е мотив повеќе за мене да влезам во тимската игра на ФФМ. Трепение, упорност и многу жртвување. Пред многу години бев на истата оваа говорница, но судбината сакаше денеска да ја добијам довербата. Фудбалот е тимска работа, поединецот не може ништо сам. Треба многу трчање од сите, многу борба да се дојде до победа. Таква е и претседателската работа во фудбалот. Ова е спорт кој бара напорна работа, и бара многу добар тим за да се постигне успех. Враќање на легендите во ФФМ е една од моите заложби, за Македонија да биде позната на фудбалски план. Чест ми е што мојата програма ја препознаа многу легенти, а дел до нив се тука. Моја втора заложба е фудбал за секое дете, секое дете да го засака фудбалот. Трето регуларно првенство, враќање на публиката на стадионите, под итно воведување ВАР технологија, а потоа рефлектори на сите стадиони и квалитетни терени. Оваа цел заеднички ќе ја оствариме, со помош на УЕФА и ФИФА, со локалната самоуправа. Максимална соработка во интерес на фудбалот. Обединување околу националните селекции, особено околу А селекција. Чесност, чист образ и транспарентност. Вратата на ФФМ ќе биде ширум отворена за секој оној кој му сака добро на фудбалот.

На денешното Собрание, беше констатирана и оставката на претседателот на ФФМ, Муамед Сејдини, кој се обрати на присутните.

Пред почетокот на официјалниот дел на Собранието се обратија поранешниот претседател Муамед Сејдини, претставниците од УЕФА и ФИФА, и изразија надеж дека фудбалот во Македонија ќе продолжи да се развива. Претставниците од УЕФА и од ФИФА го честитаа првото место во Лигата на Нации на репрезентацијата, и изразија надеж на уште позасилена инфраструктура за развој на фудбалот.

По завршувањето на вонредно изборно Собрание на Фудбалската федерација на Македонија (ФФМ), новиот претседател Масар Омерагиќ одржа состанок со членовите на Управниот одбор на федерацијата.

На состанокот, на предлог на Омерагиќ, членовите на Управниот одбор на ФФМ го избраа Марјан Стојкоски од ОФС Прилеп за потпретседател на Фудбалската федерација на Македонија на местото од досегашниот потпретседател, Лазар Ракиџиев.

На седницата, исто така, беше констатирана оставката од функцијата генерален секретар на Наталиа Илиевска Божиновска.

За в.д. генерален секретар во Фудбалската федерација на Македонија е назначен Дрилог Ганиу, досегашен заменик на првиот оперативец во „Куќа на фудбалот“.

На предлог на новиот претседател на ФФМ, македонската фудбалска легенда, Горан Пандев е назначен за спортски директор на сите македонски репрезентативни селекции.

Еден од великаните на македонскиот фудбал, Илија Најдоски заедно со нашиот поранешен репрезентативец, Агим Ибраими се назначени за советници во кабинетот на претседателот на ФФМ, Масар Омерагиќ.