Маричиќ контра Гир: Има оправданост за европското знаменце на законите за коридорите
Од политички аспект имаме основа да ставиме европско знаменце на петте закони поврзани со изградбата на коридорите 8 и 10д, за да успееме да ги изградиме овие автопати и да ја комплетираме трансевропската мрежа на коридори во Северна Македонија, изјави денеска вицепремиерот за европски прашања Бојан Маричиќ. Тој рече дека се во редовна комуникација со Европската Унија и им објасниле зошто го прават тоа.
-Отворено да си кажеме, оваа одлука е донесена за да се заобиколи нелегитимната блокада од страна на Левица, проруска партија, анти-НАТО партија, анти-ЕУ партија која ќе направи сѐ да ги спречи коридорите впишани во европските трансевропски мрежи и проект реализиран од американска компанија. Сметаме дека тоа е нелегитимна блокада која ние на легитимен начин, со инструмент кој ни е на располагање, сакаме да ја заобиколиме и за тоа имаме основа и политичка оправданост, истакна Маричиќ.
Тој знае дека овие закони не се усогласени со некое европско законодавство, но посочи дека Коридорот 8 треба да биде впишан во трансевропската мрежа на коридори на 16 мај.