Марадона бил во агонија неколку часа пред неговата смрт

Буенос Аирес – Еден од форензичките експерти одговорен за вршење на обдукцијата на Диего Марадона рече дека аргентинскиот фудбалски великан трпел агонија најмалку 12 часа пред да умре и истакна дека „секој лекар“ требало да ги забележи симптомите неколку дена порано.

Карлос Касинели, директор за судска медицина во Надзорот на научната полиција, во четвртокот даде детали за обдукцијата извршена на денот на смртта на Марадона – 25 ноември 2020 година, на 60 годишна возраст – за време на домашна хоспитализација во куќа лоцирана во општината Тигре во Буенос Аирес.

„Срцето беше целосно покриено со маснотии и згрутчување на крвта, што укажува на агонија“, рече специјалистот за време на судењето за убиство на седум здравствени работници.

Аутопсијата заклучи дека Марадона починал од акутен пулмонален едем секундарен на конгестивна срцева слабост.

Ова е пациент кој собирал вода во текот на деновите; тоа не е акутно. Ова беше нешто што можеше да се предвиди“, рече Касинели. „Секој лекар што прегледува пациент би го открил ова“.

Според обвинителството, обвинетите професионалци – неврохирург, психијатар, психолог, лекари и медицински сестри – кои се грижеле за Марадона за време на неговото закрепнување, не пружиле соодветна медицинска нега, што, наводно, довело до неговата смрт.

Во текот на истрагата, неколку сведоци сведочеа дека забележале дека лицето и стомакот на Марадона се премногу отечени.

Меѓу оние на кои им се суди се Леополдо Луке, личниот лекар на Марадона во последните четири години од неговиот живот, и психијатарот Агустина Косачов, која препишала лекови кои Марадона ги земал до моментот на неговата смрт. (АП)