Македонија2025 отвора врати кон светот: Два повика за идните лидери за стипендии за извршно образование во 2026 година

Македонија2025 денеска соопшти за два активни повика за апликации за стипендии за 2026 година, насочени кон менаџери, бизнис лидери и претприемачи од Македонија кои сакаат да го надградат своето знаење и лидерски капацитети преку врвни меѓународни извршни програми.

Првиот повик се однесува на стипендии за Зафировски програмата за извршно образование на Келог Школата за менаџмент.

Преку поддршката на Фондацијата Робин и Мајк Зафировски и партнерството со Келог Школата за менаџмент, оваа програма овозможува стипендии за учество во престижната Програма за развој на извршни менаџери (EDP – Executive development program) на Универзитетот Нортвестерн во Чикаго, САД.

Програмата е наменета за искусни менаџери и претприемачи кои имаат најмалку 10 години професионално искуство и стремеж за унапредување на својот бизнис и зајакнување на економскиот развој на Македонија. Кандидатите учествуваат со сопствено кофинансирање.

Алумни заедницата на Зафировски програмата денес брои неверојатни 52 личности кои со своето знаење и визија веќе го менуваат македонското стопанство.
Повеќе информации за повикот, критериумите и начинот на аплицирање на следниот ЛИНК.

Вториот повик е за доделување на стипендии во соработка со Смит Школата за бизнис на Квинс Универзитетот во Кингстон, Канада. Кандидатите имаат можност да изберат меѓу двете програми: Лидерство или Стратешко извршување, секоја во времетраење од 5 работни дена во 2026 година.

Програмата е возобновена од минатата година и предизвикува голем интерес кај македонската бизнис заедница. Таа е наменета за средни и високи менаџери, како и за успешни претприемачи со најмалку 5 години релевантно искуство.

Македонија2025 покрива две третини од трошоците, додека кандидатите учествуваат со сопствено кофинансирање.

Повеќе информации за повикот, критериумите и начинот на аплицирање на следниот ЛИНК.

Со овие два повика, Македонија2025 обезбедува уникатна можност за професионален раст, пристап до најсовремени знаења и создавање мрежа со глобални бизнис лидери. Крајната цел е да се зајакнат менаџерските капацитети во Македонија и да се поттикне долгорочен економски развој.

Рокови за аплицирање:

• Зафировски програмата за извршно образование – до 16 октомври 2025

• Програмата за извршно образование во Канада – до 25 октомври 2025

Воо соопштението до медиумите се вели дека за дополнителни информации заинтересираните може да се обратат на Нена Манчев, програмска менаџерка за програми од областа на лидерство и образование на [email protected] 

„Македонија2025 останува посветена на градењето генерации лидери кои ќе ја движат нашата земја напред. Ова е ваша можност – инвестирајте во себе за да ја промениме Македонија заедно“, порачуваат од Македонија2025.