Горан Пандев ја предводеше селекцијата на фудбалски ветерани на Македонија на вчерашниот хуманитарен меч против Бугарија во Варна, од кој сите приходи се наменети за семејствата на жртвите од големата трагедија во Кочани.
Пандев во мечот јавно им се заблагодари на бугарските ветерани и на федерацијата на нашиот источен сосед за покажаната солидарност и иницијативата за одигрување на еден ваков натпревар.
„Се заблагодарувам од наше име и името на цела Македонија, како и од претседателот на Фуддбалската федерација на Македонија.Благодарни сме за прекрасната организација, за нас беше чест да го одиграме овој натпревар со најдобрата генерација на бугарскиот фудбал и се надевам и дека во иднина ќе имаме вакви прилики, тие да ни бидат гости и во Македонија. Како што кажа Христо (Стоичков) децата не можеме да ги вратиме, беше голема трагедија, не само за Македонија, туку и за цела Европа, никогаш повеќе да не се случи. Со оваа иницијатива сакавме малку да помогнеме колку што можеме бидејќи спортот е најголем амбасадор на Европа. Одигравме добар натпревар, се забавуваме игравме како браќа и навистина ни беше чест што сме тука“, изјави Пандев за медиумите по натпреварот во Варна.
Ветераните на Бугарија и на Македонија одиграа две полувремиња од по 35 минути, а на крајот славеа нашите фудбалери со 3-2, со головите што ги постигнаа Божинов, Пандев и Тасевски.
