Магичен крај на „Скопско лето“ со Вивалди, Пјацола и едно изненадување
Восхитувачка интерпретација и музичка префинетост покажаа професионалните млади инструменталисти од Камерниот оркестар на Музичката младина на Македонија „Саша Николовски-Ѓумар“, музицирајќи синоќа (по настапот на „Охридско лето“) во преполниот Сули ан, за затворањето на „ Скопско лето“, под диригентската палка на искусниот Иван Еминовиќ.
Убав свет се собра ( и покрај вревата кај портата од туристи и минувачи) да слушне одлична и уникатна програма: еден вид натпревар помеѓу двајцата великани Антонио Вивалди и Астор Пјацола, кои твореле во различни епохи, изведувајќи ги нивните годишни времиња, секој од својата доба. Имаше многу убава фузија на звуци. Комбинацијата на истоимените дела, донесе сплет од различни расположенија, и ги нагласи културолошките разлики помеѓу медитеранска Европа и срцето на Јужна Америка. Репертоарот синоќа заврши со еден, народен бисер, преработка за камерен оркестар на „Се посврши сербез Донка“.
Камерниот оркестар на Музичката младина на Македонија постои 38 години и е основан како прв сегмент на Летниот музички камп на МММ во Охрид во 1986 година. Повеќе од 400 млади музичари биле дел од овој уникатен состав, а диригенти и уметнички раководители на оркестарот биле: Ф. Муратовски, Г. Коруновски, С. Николовски-Ѓумар, В. Николовски-Ѓумар, М. Спасов, Б. Цанев, А. Ремерајт, Б. Чадловска, О. Кондратенко, Миша Кац, Џанлука Мартиненги и Елена Митревска.
Оркестарот има остварено повеќе од 100 концерти добивајќи голем број позитивни критики и признанија, а на неговиот репертоар, покрај делата од светската класика, свое место наоѓаат и делата на современите македонски композитори.
Од 2018 година оркестарот го носи името на македонскиот диригент Саша Николовски-Ѓумар. (Л.С.)
