Луд, збунет, нормален

ЛЕЈЛА САБИТ

Секој втор ден во Македонија се прашуваме: Кој е овде околу нас луд, збунет или нормален?

Комичната серија „Луд, збунет и нормален“ со Мустафа Надаревиќ како Изет-од ТВ екраните ни се случува во реалноста ама како трагична серија.

Тоа е тоа. Јавето се претвори во реални шоуа, сапуници и хумористични серии.

Гледавме  “Преживување”,”Фарма”, “Големиот брат”,”Битанги и принцези”,

“Спонзоруши”…

Ниедна не беше македонска продукција, ама сценариото ни е исто.

Преживуваме.

Одгледуваме пченка, копаме во бавча, користиме полско веце…

Лажеме,изневеруваме, глумиме, си подвалуваме, се сакаме и простуваме.

Шпиунираме и кодошиме.

Знаеме да бидеме, добри, лоши, злобни, да се умилкуваме…

Должиме пари, ни должат пари, завидуваме на успех, богатство и на изглед.

Се смееме на сопствена и на туѓа сметка.

Имаме брачни триаголници, се знаат битангите,принцезите и спонзорушите.

Само уште не знаеме кој е луд, кој е збунет, а кој нормален.

Ништо чудно што кај нас се снимаа само досадни серии за обичните луѓе кои се борат со мизерната плата да преживеат до први, а ниту една гламурозна.

Зашто животот околу нас е евтина сапуница, но без т.н. ВИП фаци, ексклузивни гости, поп-ѕвезди и свечени тоалети.

Пред нас се илјада и една ноќ на исчекувања, политички разврски, Ковид-стресови и надеж дека налето ќе се капеме во море.

Озборувањата, интригите, заткулисните игри… продолжуваат и во Новата година.