Левица бара суспензија на државните пари за ДУИ поради донациите од „Еуровиа“

Партијата Левица бара да се суспендира исплатата на државни дотации за ДУИ поради незаконски високите донации од „Еуровиа“, која пак во последниве пет години добила државни тендери во вредност од 16 милиони евра.

-Покрај сомнежите за корупција при добивање на тендерот за оваа компанија-миленик на ДУИ, незаконитост има и во висината на донациите од страна на „Еуровиа”. Односно, износот на донацијата изнесува шест пати повеќе од законскиот максимум за донација.

Законот за финансирање на партии предвидува политичката партија најдоцна во рок од 15 дена од денот на добивањето на донацијата, разликата меѓу дозволената и донираната вредност да ја врати на донаторот. Доколку ДУИ не постапиле согласно овој закон, Законот предвидува суспензија на државното финансирање која го добива партијата, која во мај доби 600.000 евра од Буџетот на Република Македонија.

Манипулациите на министерот Османи се потценувачки за јавноста, кој изјави дека не знаел дека се работи за компанија – донатор на ДУИ, за подоцна да се појави заедничка слика со сопственикот Елмедин Адеми. Бидејќи неколку дена од ДУИ одбиваат да одговорат дали е вратена незаконската донација, оправдани се сомнежите дека и во овој скандал институциите не постапиле согласно законите, стои во реакцијата на оваа партија.

Затоа Левица го повикува Државниот завод за ревизија да постапи согласно своите законски надлежности и да поднесе барање за поведување на прекршочна постапка или пријава до Обвинителство согласно законот – во спротивно, Левица ќе поднесе со цел доследно спроведување на законот.

-Јасно е дека неказнивоста на ДУИ е најголем генератор на криминал и корупција, додека нивната заштита од органите на прогонот резултира со држава која е претворена во хибриден режим, каде компаниите блиски на ДУИ го цедат буџетот финансиран од џебот на сиромашните граѓани, порачаа од Левица.