Лажна дојава за поставена бомба во ООУ „Киро Глигоров“
Општина Центар ги информира граѓаните дека станува збор за лажна дојава која утринава преку електронска пошта стигна на адреса на училиштето.
Веднаш по добивање на веста случајот е пријавен во Министерството за внатрешни работи по што од училиштето евакуирани се сите ученици. Родителите на децата од помалите одделенија се известени и истите се повикани да ги земат децата од училиште.
Од страна на полициските службеници преземени се сите мерки и антитерористички проверки по што е утврдено дека станува збор за лажна пријава.
Ова е втора дојава за бомба во основно училиште во Општина Центар. Изминатиов период дојава за бомби преку електронски пат имаше во неколку средни и основни училишта во Скопје и во неколку државни институции.
Општина Центар апелира на смиреност. Во соработка со надлежните институции ги презема сите неопходни мерки за заштита на учениците и сите вработени во образовните институции.