Лауреатот од Берлинале, Емин Алпер во зенитот на својата слава доаѓа на Киненова во Скопје
Скопје од 14 до 18 октомври станува епицентар на светската кинематографија. Годинава, почесен гостин и лауреат на ИФФК Киненова е филмскиот генијалец од Турција, смелиот и бунтовен маг на психолошката драма – Емин Алпер. Автор, кој доаѓа во Македонија во зенитот на својата слава, откако пред само неколку месеци со својот најнов ремек-дело филм „Спасение“ (Kurtuluş) буквално ја покори филмска Европа и ја понесе престижната „Сребрена мечка“ (Награда од големото жири) на Берлинскиот филмски фестивал. ИФФ Киненова уште еднаш докажува дека носи уметници од највисок светски ранг, признаени и крунисани од светската критика, колегите и публиката.
Турските филмови имаа годинава двоен триумф со освоените Златна и Сребрена мечка“. „Златната мечка“ ја доби турскиот филм „Жолти писма“ на Илкер Чатак, авторот кој ја одушеви берлинската публика и пред две години со својот филм „Наставничка канцеларија“, подоцна номиниран за „Оскар“. И сега Чатак повторно прави силен ангажиран филм, кој зборува токму за денешните тоталитарни системи, што сè повеќе се во подем, како во овој дел на светот, така и пошироко.
По повод доаѓањето во Скопје и примањето на престижната награда за особен придонес во светската филмска уметност, Емин Алпер испрати моќна и емотивна порака.
-Создавањето уметност, вклучително и филмска уметност, е секогаш задоволство само по себе. Но, кога ќе ви биде доделена толку голема награда и ќе ви биде оддадено толку високо признание, како што јас го добивам оваа година на ИФФ Киненова 2026, што покажува дека вашата работа е ценета, задоволството се претвора во блаженство! Кога добив писмо од Небојша Јовановиќ, во кое ме извести дека ја добивам наградата за особен придонес во светската филмска уметност, почувствував огромно задоволство и возбуда. Голема чест ми е да слушнам дека моите филмови придонесуваат во светот на уметноста. Подеднакво е одлично да се добие оваа награда во соседните земји, чија култура и историја се многу блиски до мојата. Исто така е прекрасно да се добие ова признание од фестивал кој во изминатите 10 години направи извонредно многу за светот на филмот и стана значајно и препознатливо место за вистинска филмска уметност, не само во Македонија, туку и низ целиот Балкан. Всушност, мислам дека вистинскиот придонес кон уметноста доаѓа од организаторите – познатите и непознатите херои зад ваквите фестивали. Се заблагодарувам на Киненова за нивниот голем придонес кон светската филмска уметност и киното. Исто така, искрено се заблагодарувам за исклучителната и престижна награда и честа која ми ја прават на овогодинешното издание на фестивалот. Нестрпливо го чекам ова возбудливо патување кон Македонија!, вели Алпер во својата порака.