Kратки филмови и студентските на Тарковски на Филозофскиот филмски фестивал

На 11. Филозофски филмски фестивал (ФФФ) вечер во Кинотеката од 18 часот репризно ќе бидат прикажани студентските краткометражни филмови на рускиот режисер Андреј Тарковски – неговиот прв  филм од филмската академија во Москва, „Убијци“ (1956), адаптација на истоимената новела од Хемингвеј,  „Нема да има опуштање денес“ (1959), втор филм на Тарковски од неговите студентски денови, трилер базиран на вистински поствоен инцидент, и неговиот дипломски филм „Парното тркало и виолината“ (1960).

Проекцијата ќе биде бесплатна за посетителите и е организирана во соработка со Амбасадата на Руската Федерација во Скопје, Кинотеката и Меѓународниот славјански универзитет „Г. Р. Державин“.

Посетителите ќе имаат уште една можност да го проследат и излагањето на рускиот професор Игор Евлампиев од Државниот универзитет во Санкт Петербург, автор на книгата „Филозофијата на уметноста на Андреј Тарковски“ од 2001, која детаљно го анализира филозофскиот светоглед на Тарковски, ги разгледува неговите филмски дела во поширокиот контекст на руската и западната филозофија од 19 и 20 век и го преиспитува односот меѓу филмот и филозофијата.

На ФФФ вечер од 20.30 часот следуваат проекциите на краткометражните филмови од официјалната селекција. Организаторите соопштија дека доколку дозволат временските услови, публиката ќе ги гледа филмовите во летното кино „Мирно лето“, а во спритивно – во салата на Кинотеката.

Ќе бидат прикажани 11 филмски остварувања од целиот свет за кои влезот е слободен. Во конкуренција за „Златен був“ од публиката и жирито ќе се натпреваруваат перуанскиот филм „Тишината на реката“ (El Silencio del Río), грчкиот „Пола“ (Pola), португалскиот „Урсула’“ (Ursula), остварувањата од Норвешка „Риба“ (Fisk) и „Засегнатите“ (The Affected), францускиот „Пипо и слепата љубов“  (Pipo and blind love), египетскo-германската копродукција „Стапица“ (Fakh), израелскиот „Пет – седум – пет“ (Five – Seven – Five) и иранскиот филм „Сона“ (Sona).

Во рамки на натпреварувачката програма, конкурираат три македонски филмови – „Прашливи цвеќиња“ на Мирослав Илиќ, кој беше прикажан вчера, а вечер на програмата се кратките македонски „Последната светлина“ на Јован Саркањац и „Кавал“ на Саша Станишиќ.