Премиерот Димитар Ковачевски извести дека Владата го задолжила Министерството за внатрешни работи да направи проценка за евентуалните гости од Бугарија што се најавуваат дека ќе дојдат на чествување на годишнината од раѓањето на Гоце Делчев во Скопје. Она што се дискутирало на седницата на Советот за безбедност е класифицирано како строго доверливо, вели Ковачевски но посочува дека претседателот на прес-конференцијата по седницата го кажал сублиматот.
-Дефинирањето на влезот во државата на странски државјани се регулира со Законот за странци, каде што има член во којшто е наведено дека на државјанин на друга држава што сака да влезе во нашата држава, а доколку претставува закана по јавниот поредок, националната безбедност, меѓународните односи или по јавното здравје, може да му се забрани влез. Проценката за личностите, проценката за тајмингот ја прави Министерството за внатрешни работи, нормално, врз основа на информациите со кои располага и врз основа на информациите што ги споделува со другите безбедносни служби. Тоа ќе биде одлука на МВР. Она што јас би сакал да апелирам е да бидеме мирни и достоинствени, бидејќи МВР ќе направи сè за да биде во најдобар ред одбележано раѓањето на великанот на македонската национална борба – Гоце Делчев, кажа Ковачевски.
И покрај ваквите апелите од државниот врв за мирно и достоинствено чествување, поради очекуваното присуство на бугарски провокатори македонски граѓани упатија повик за организирање ноќни стражи во црквата „Свети Спас“ – за да „не се дозволи некој да го слави Делчев како Бугарин“. Иницијативата доби поддршка и од членови на ВМРО-ДПМНЕ и на Левица, кои најавуваат дека уште од петок попладне ќе дојдат да бдеат на гробот на Гоце Делчев. На социјалните мрежи има и повици за блокади на патиштата што водат од Бугарија кон Скопје.
Истовремено, иницијаторот за бугарско одбележување на годишнината, Виктор Стојанов од бугарската фондација „Македонија“, сега повикува на тивко и мирно положување цвеќе „без провокации и без одговарање на провокации“. Планот им е да се соберат во 11.30 на паркингот кај Кале, напладне, во група да оддадат почит и веднаш да се вратат во Софија, за што ја известиле македонската полиција.
Паралелно со провокаторите во Скопје ќе дојдат и првите луѓе на бугарското МВР и на Државната агенција за национална безбедност кои во соработка со нашите служби и нашето МВР треба да обезбедат чествувањето да помине мирно и без инциденти.
