Ковачевски: Имам резерва кон намерите на Мицкоски

Се уште гледаме блокада во Собранието од страна на ВМРО-ДПМНЕ и таа  трае повеќе од две години. Од последните парламентарни избори, се блокираат секакви законски решенија, особено оние кои се важни за граѓаните и за компаниите во време на криза. Сметам дека ова не е време за блокади и политички поени, туку  е време кога сите треба да се справиме со оваа енергетска и економска криза, порача претседателот на СДСМ, Димитар Ковачевски во интервју за ТВ 21.

Ковачевски истакна дека има резерва кон намерите на Мицкоски и смета дека тие не се во интерес на граѓаните.

Осврнувајќи се на економските мерки Ковачевски истакна дека тие даваат резултат и граѓаните ги чувствуваат придобивките од нив.  

„Јас бев критикуван кога ја зголемивме минималната плата на 18.000 денари, но сега се потврди дека тоа беше вистинска одлука. И ако денес ја погледнете мининалната плата каква бил кај претходната власт, а каква е сега, ќе видите дека сега е двојно зголемена, за 100%. Пензиите од март до сега се зголемени за 10 отсто, до март следната година ќе бидат зголемени за уште шест проценти, што значи 16% за една година. Тоа се вистински и одговорни, социјалдемократски политики “ порача Ковачевски, додавајќи дека се подготвува нов пакет на мерки за помош на најранливите категории граѓани.

Тој исто така оцени дека Владата е стабилна и парламентарното мнозинство овозможува нејзино непречено функционирање и покрај случувањата во ДУИ.

„Имам редовни состаноци со Али Ахмети, но не можам да се мешам во нивните внатрепартиски работи“, изјави премиерот. Не може да зборува, рече, во име на пратеници на ДУИ, но смета дека од тројца пратеници на оваа партија Владата и натаму ќе има поддршка.

За влез на партијата Алијанса за Албанците во Владата не е разговарано со новиот лидер Арбен Таравари, но рече дека секоја поддршка на европскиот пат на државата и на носење мерки за справување со економската и енергетската криза и со сите предизвици на државата смета дека е поддршка за која треба да се разговара и да се поздрави.

-На последниот настап во Парламентот кажав дека сега е време кога треба да се обединиме зашто имаме пред нас остварување стратешки цели на државата – продолжување на патот кон полноправно членство во Европската Унија и овозможување на најдобар начин да се справиме со енергетската и економската криза во која се наоѓа и државата и  целиот европски континент. Со господинот Таравари се немам видено, но секогаш сум имал контакти со пратениците од партијата Алијанса, рече Ковачевски во емисијата „Клик плус“ на ТВ21.

Тој не смета дека има потреба од формирање широка коалиција во која би била и ВМРО-ДПМНЕ, како во 2001 година, затоа што, рече, не смета дека во моментов државата се наоѓа во политичка или во воена криза.

– Сметам дека Владата има апсолутно капацитет да се справува со сите овие прашања и тоа го потврди од самото нејзино формирање – и оваа влада, и претходната влада на ова парламентарно мнозинство, зашто успешно се справи со корона-кризата, со негативните економски ефекти што ги имаше во тоа време и сметам дека успешно ќе се справиме и сега, но заедно со сите граѓани и со претставниците во Парламентот, истакна Ковачевски.

По загубата на Локалните избори минатата година и падот на рејтингот, СДСМ сега е апсолутно консолидирана, додаде премиерот и лидер на оваа партија, а потврда за тоа, посочи тој, се добрите резултати на партијата со коалицијата на новите избори во Маврово и Ростуше, Тетово и Центар Жупа.