Костадиновски до партиите: Тргнете ги рацете од Уставниот суд
Тргнете ги рацете од Уставниот суд! Останете реално и вистински посветени на заложбите за владеење на правото, за правна држава за европски вредности. Секој што мисли дека владеењето на правото и правната држава ќе биде попречена со политички манипулации, притисоци и влијанија, да не се труди! Никој не е над Уставот. Секој е должен да го почитува Уставот. Никој н може да има повеќе власт и права од оние што му ги доделил Уставот!
Ова им го порача претседателот на Уставниот суд Дарко Костадиновски на денешната прес – конференција на политичките чинители во државава.Тој упати порака и до граѓаните да бидат спокојни, бидејќи Уставниот суд ќе продолжи безкомпромисно да го чува Уставот и граѓанските слободи и права.
-Владеењето на правото и правната држава не можат да повредат ничии права или чувства, напротив, тие се гаранција за вашите слободи и права кои се признати со меѓународното право и утврдени во Уставот! Не дозволувајте вашите чувства да бидат манипулирани од било кого. Силата на Уставот е втемелена во волјата на секој од нас да го штити и да застане зад него. А јас, ќе останам доследен на моето ветување од првиот ден како претседател, лојален сум само на Уставот и никому друг, истакна Костадиновски.
Костадиновски притоа извести дека Венецијанската комисија на 18 март ќе го испрати мислењето за Законот за јазиците што, по барање на Уставниот суд, го прифатила. Подготвителната седница за законот е најавена да се одржи најдоцна до 21 март. Листата на учесници на седницата, предложена од судијата известител Елизабета Дуковска, се очекува да биде утврдена утре и ќе вклучува повеќе од 20 експерти, меѓу кои уставни и меѓународни правници и поранешни судии.Костадиновски истакна дека побарале претставник од Венецијанската комисија да дојде на подготвителната седница за да го образложи пријателскиот совет и ставовите на Комисијата. Очекувањата се седницата да се одржи на 19, 20 или 21 март.
Двајцата уставни судии од албанска националност, Осман Кадриу и Насер Ајдари, веќе најавија дека нема да присуствуваат на подготвителната седница. Костадиновски изрази жалење поради нивната одлука и нагласи дека не смее да се дозволи судиите да се водат од етнички преференции. Според него, не е возможно да се биде првин Македонец, а потоа уставен судија, нагласувајќи дека ако се гледа низ таква призма, правната држава ќе биде загрозена. Судот продолжува да работи, без разлика на тоа што понекогаш работел само со пет судии.
Костадиновски ги оцени неодамнешните изјави на премиерите на Албанија и Косово, Еди Рама и Албин Курти, како непристојни и недостојни, но не сакаше да ги коментира понатаму.