Конференција „Жените во надворешната политика“ под покровителство на првата дама Ѓоргиевска

Дводневна конференција „Жените во надворешната политика“ ќе се одржи денеска во Скопје во организација на Министерството за надворешни работи, на иницијатива на заменик министерката за надворешни работи Фатмире Исаки, а под покровителство на првата дама на Република Северна Македонија, Елизабета Ѓоргиевска.

Како што соопшти МНР, во фокусот на конференцијата ќе биде унапредувањето на позицијата на жените како во надворешната политика, така и во сите други процеси на донесување одлуки во државава.

На конференцијата, воведно обраќање ќе има министерот за надворешни работи Бујар Османи.

На дводневниот форум, според организаторите, предвидено е да се обратат и премиерот Зоран Заев, поранешната државна секретарка на САД Медлин Олбрајт, евроамбасадорот во земјава Дејвид Гир, шефицата на шведската дипломатија Ан Линде, Клеменс Која, шеф на мисијата на ОБСЕ во земјава, амбасадорката на САД во земјава Кејт Мари Брнз, британската амбасадорка Рејчел Галовеј…

Конференцијата ќе служи како платформа за размена на мислења меѓу високо рангирани политичари и дипломати од регионот и жени-амбасадорки, учесници од други европски и вон-европски земји, учесници од меѓународни и регионални организации како ОН, ЕУ, НАТО, Советот на Европа, ОБСЕ, Советот за Регионална Соработка, почесни конзули, реномирани фигури од академијата, бизнисот, медиумите, цивилното општество и младинските организации, се додава во соопштението на МНР.