Компромисите и натаму се неопходни, изјави новата германска амбасадорка

Претседателот Стево Пендаровски денеска ги прими акредитивните писма на новоименуваната амбасадорка на Германија, Петра Дрекслер. Посакувајќи ѝ добредојде на амбасадорката Дрекслер, претседателот Пендаровски оцени дека двете држави ги поврзува традиционално и искрено пријателство, што е засновано на разновидна соработка, меѓусебно почитување и отворен пристап.

Тој оцени дека за нас е особено значајно што Германија демонстрира јасна подготвеност за поддршка на Македонија на патот кон полноправното членство во Европската унија.

Во обраќањето амбасадорката Дрекслер оцени дека нашиот билатерален однос е одличен и се протега многу подалеку од соработката на ниво на влади и тој го опфаќа ангажманот на политичките фондации и организациите на културните медијатори или на големата билатерална Стопанска комора, која е израз на опсежното присуство на германското стопанство во Северна Македонија и ја отсликува позицијата на Германија како најзначаен трговски партнер.

„Посетите на претседателот, на канцеларот и на министерката за надворешни работи изминатите месеци се јасни знаци за тоа дека стоиме на страната на Вашата земја. Сојузната влада и понатаму ќе го придружува пристапниот процес кон ЕУ како доверлив партнер. Свесни сме за компромисите кои ги изискуваше овој пат и се болни за многу луѓе во Македонија и кои и понатаму се потребни за неопходната уставна промена“, рече Дрекслер.