Кој е Мустафа Имери, првиот директор Албанец на Филхармонија?

Мустафа Имери (1981, Скопје) е новиот директор на Македонската филхармонија, што го назначи ресорниот  министер Зоран Љутков, на јавно распишан конкурс. 

Вработените во Македонската филхармонија изминатиов период протестираа пред Министерството за култура и туризам, затоа што се сомневаа на потенцијална партизација во однос на изборот на директор на оваа институција, и бурно реагираа со отворено писмо до премиерот Мицкоски и министерот за култура Љутков, оценувајќи дека процесот е компромитиран.

Според конкурсот, директорот на Филхармонија треба да има најмалку пет години работно искуство во културата, да биде истакнат културен работник со докажани референци, да приложи четиригодишна развојна програма и да поседува меѓународен сертификат за англиски јазик (B2).

Тогаш Левица јавно го праша министерот Љутков:  Дали посочениот Имери ги исполнува овие критериуми или неговото учество на „Нота фест“ ќе му биде доволна препорака?

Протестот на вработените во Македонска филхармонија доаѓа откако претходно вицепремиерот и министер за животна средина Изет Меџити во ТВ интервју посочи дека при поделбата на раководните функции во институциите, „Вреди“ ја добил Филхармонијата и дека директор ќе биде Мустафа Имери. 

Кој е Мустафа Имери, првиот директор Албанец на Филхармонија?

Според достапните информации, тој бил професор-тенор и 15 години раководител на Катедрата на албански јазик во средното музичко училиште „Илија Николовски-Луј“. Завршил на ФМУ во Скопје, и е дипломиран соло-пејач. Во јавноста е познат кога лани, во февруари, на прес-конференција обвини дека бил разрешен бидејќи објавил фотографија со лидерот на Демократско движење Изет Меџити. (Л.С.)