Кој беше Денис Монастирски, министерот што ја загуби војната?

Околностите за хеликоптерската несреќа во која загина украинскиот министер за внатрешни работи Денис Монастирски се уште не се разјаснети, но загубата за државниот врв е голема, бидејќи тој го водеше еден од двата најважни ресори во државата. Кој е Монастирски, министерот кој беше доста цитиран во странските медиуми но никој немаше време да открива со што ја заслужи и како ја исполнуваше оваа функција.

Монастирски важи како  еден од оние кои уживаат голема доверба кај  украинскиот претседател Володимир Зеленски. Тој беше еден од предводниците на претседателската кампања на Зеленски на претходните избори, а  пред година и пол беше назначен на функцијата што ја извршуваше до денес.

Имаше 41 година и важи за еден од најобразованите министри на украинската влада. Пред да влезе во политиката се занимаваше со адвокатура.Кога станува збор за неговата политика во врска со војната што ја зафати неговата земја, Монастирски секогаш велеше дека е сигурен во победата на Украина.

На самиот почеток на војната, на 18 март минатата година, во едно од неговите интервјуа тој изјави дека на неговата земја ќе и треба долго време да се опорави од разорните последици од руската инвазија.

„Огромен број гранати и мини беа испукани кон Украина и повеќето од нив не експлодираа. Тие остануваат под урнатините и претставуваат реална закана. Ќе бидат потребни години, а не месеци за да се отстранат. Покрај руските неексплодирани убојни средства, украинските војници поставија нагазни мини на мостови, аеродроми и други клучни локации за да ги спречат Русите да ги користат. Нема да можеме да ги отстраниме мините од целата територија, затоа побарав од нашите меѓународни партнери и колеги од Европската унија и од САД да подготват групи експерти за деминирање на бојното подрачје и објектите кои беа под гранатирање“, рече Монастирски.

Тој истакна дека губат многу опрема за време на руското гранатирање, но дека тоа нема да ги деморализира.

„Еден од најголемите предизвици со кои се соочува Министерството за внатрешни работи е гаснењето на пожарите предизвикани од немилосрдните руски гранатирања и воздушни напади. Службите за итни случаи во земјата, под надзор на Министерството, се соочуваат со очаен недостиг на персонал и опрема“, рече Монастирски.

На крајот тој изјави дека Русите најмногу ги изненадило тоа што украинскиот народ не се плаши од нив.

„Масовните протести што избија во Бердјанск, Мелитопол, Керсон и други окупирани украински градови беа изненадување за Русите, кои очекуваа да бидат поздравени од проруските локални жители. Сепак, тие дојдоа лице в лице со цивили кои зборуваат руски, но проукраински. Сега сфаќаат дека направиле голема грешка“, изјави тогаш министерот.

 Монастирски функцијата министер за внатрешни работи ја извршуваше од средината на јули 2021 година, кога на таа функција го наследи Арсен Аваков. Тој беше одговорен за украинската полиција и другите служби за итни случаи и е највисокиот украински функционер кој загинал од почетокот на војната со Русија пред речиси 11 месеци.

Тој беше  близок соработник на Антон Герашченко, неуморен и еден од најпознатите промотори на украинската верзија на вистината за војната со Русија на Интернет. Герашченко е долгогодишен советник на министрите за внатрешни работи, на починатиот министер Монастирски, како и на неговиот претходник Аваков, а извесно време беше и заменик на двајцата (еден од седумте).

Монастирски влезе во политиката во 2002 година, а од 2014 до 2019 година беше помошник и консултант на Герашченко. Во тоа време, во 2014 година, во Украина се случи револуцијата на Мајдан, прорускиот претседател Виктор Јанукович беше соборен, Русија го анектира Крим и започна војната во Донбас. Герашченко ги информираше новинарите за формирањето на баталјоните Донбас и Азов и беше еден од основачите на сепаратистичката база на податоци наречена Миротворац, а Монастирски беше во неговиот тим. Токму поради работата со Герашченко, се смета дека Монастирски бил поврзан со разрешениот министер за внатрешни работи Аваков, кој на таа функција помина седум години.

Монастирски важеше за оптимална и компромисна фигура за трансфер на власта во Министерството за внатрешни работи. Војната го пречека како министер, а беше опишан како дипломатска личност. По смртта на Монастирски, Герашченко веднаш објави дека загинатите се негови пријатели.

„Моите пријатели, државниците Денис Монастирски, Јевхен Џенин, Јуриј Лубковиќ и сите што беа во тој хеликоптер, беа патриоти кои работеа да ја направат Украина посилна. Секогаш ќе ве паметиме. Вашите семејства ќе бидат згрижени. Вечен спомен за моите пријатели“, рече Герашченко.

Монастирски е роден во Хмелницки, град во западна Украина на 12 јуни 1980 година. Дипломирал на Правниот факултет на Универзитетот за менаџмент и право , а подоцна и докторирал. Тој ја водеше Катедрата за законодавство и научна експертиза на истражувачкиот дел на Универзитетот за менаџмент и за право во Хмељнички и беше вонреден професор.
Тој е ко-основач и член на одборот на младинското културно здружение  „Во иднината преку културата“. По кариерата на универзитетот, од 2007 година работи како адвокат во повеќе фирми.Во 2013 година е прогласен за волонтер на годината во земјава.

Во 2019 година, тој беше претставен како експерт во тимот на Володимир Зеленски, тогашен претседателски кандидат, за реформи во спроведувањето на законите. Зеленски набрзо стана претседател, а Монастирски влезе во државниот парламент, Врховната Рада, на листата на неговата партија Слуга на народот. Тој ја предводеше Комисијата за спроведување на законот во парламентот. Од 24 јули 2020 година, движењето ЧЕСНО го прогласи за еден од пратениците на народот кој доставил најмногу сметки.

Тој имаше извонреден инстинкт за воен пи-ар и негова маскота е кучето Патрон, кое доби медал од претседателот зеленски и стана меѓународен бренд за украинската храброст и одбрана, но и за заштита на животните. Во мај 2022 година Монастирски  го формираше Меѓународниот координативен центар  за деминирање со Патрон како негова маскота, поради заслугите на овој џек расел кој досега откри официјаллно околу 200 бомби како дел од тимот за деминирање во областа на Харкив. Освен медалата за храброст од Зеленски, Патрон доби и Кучешка палма на Канскиот фестивал лани и беше прогласен за амбасадор на добра волја од УНИЦЕФ, како и директор за јавна комуникација во организацијата за заштита на животни. 

Монастирски беше меѓу првите што ги пречека борците на Азов баталјонот кога беа ослободени од Русија како дел од трампа на заробеници и беше на местата кои останаа запаметени по големи цивилни жртви и трагедии.

„Толку сме горди на нашите спасувачи! Се бориме за секој живот! Затоа што Украина е украински народ!“- напиша тој по една спасувачка акција во која беше вклучена полицијата.

„Ракетен напад во Днепар. 100% воено злосторство на Русија. Полно со цинизам и суровост.
Станбена зграда од девет ката, куќата е уништена од вториот до деветиот кат. Во работата се вклучени повеќе од триста спасувачи, полицајци и волонтери. Ние сме во потрага и работиме. Додека не ги најдеме сите живи. Се додека не ги казниме сите инволвирани“м напиша тој на Фејсбук по нападот на станбената зграда минатата недела од кој се згрози светот.

Монастирски  беше оженет и имаше два сина.