Кочо Анѓушев го демантира ВМРО-ДПМНЕ: Немам никаква поврзаност со фотоволтаичната централа во Осломеј


 

На острото денешно соопштение на ВМРО-ДПМНЕ дека она што партијата го нарекува „картелот Заев – Анѓушев“ преку нарачана физибилити студија сакале да се „дограбат до земјиштето на ТЕЦ ‘Осломеј’ и новата фотонапонска централа на таа територија“, стигна исто така остра реакција на Кочо Анѓушев. Во неа тој ги отфрла сите наводи на Комисијата за енергетика на ВМРО-ДПМНЕ како невистинити и вели дека нема никаква поврзаност со фотовлтаичната централа во Осломеј.

„Најостро демантирам дека било која компанија во која што јас или моето семејство сме дел од сопственичката структура, има некаква поврзаност со фотоволтаичната централа ‘Осломеј’. Сите шпекулации кои го пласираат спротивното се неточни и крајно тенденциозни со единствена цел да го нарушат мојот, угледот на моето семејство и реномето на компаниите со кои раководам.

Целото мое професионално и општествено делување е насочено кон домашниот економски развој, постојано инвестираме во воведување на најсовремени и еколошки технологии, а јас лично го вложувам сето мое знаење и капацитет во напорите за вкупна транформација на енергетскиот сектор во систем кој што ќе биде стабилен и одржлив. Компаниите со кои раководам вработуваат над 1.000 луѓе, го полнат државниот Буџет и се мотор на економскиот развој. Нашите производи се извезуваат во 42 земји ширум светот, учествуваме на пазари како САД, Велика Британија, Франција, Германија, Данска, Белгија, Португалија, Австралија и многу други. За овие успеси никогаш не сме барале, ниту ќе бараме привилегии или специјален третман од никого, но најмалку што очекуваме фер, коректен пристап и  да не бидеме злоупотребувани во ничија медиумска и политичка агенда“, вели Анѓушев.

Тој апелира до сите партии да престанале во нивните дневно-политички препукувања да го споменуваат неговото име и семејство. „Не сум партиски определен, ниту имам политички амбиции. Бев дел од политичка влада како предлог на Стопанската комора и за време на мојот мандат како заменик претседател на владата сѐ што правев беше исклучиво насочено кон подобрување на животниот стандард на граѓаните и развој на домашната економија. На ‘Стратегијата за развој на енергетиката во Република Северна Македонија до 2040’ сум особено горд и сметам дека е одличен документ кој треба да служи како патоказ и на оваа и на следните влади“, вели во својата реакција Кочо Анѓушев.