Кирил Петков за Македонија: „Заедно можеме повеќе, доаѓам во јануари“

Бугарскиот премиер Кирил Петков од изолација, со видео порака, најави дека неговата одложена посета на Скопје ќе се оствари во јануари. Петков рече дека ќе дојде во Скопје „за да покаже оти преку конструктивен дијалог можеме да направиме многу повеќе од она што се случи во последните години“.

Петков е во изолација по контакт со заразен од корона вирусот на вчерашниот состанок кај претседателот Румен Радев и ја одложи посетата претходно закажана за 18 јануари. Во обраќањето тој му се заблагодари на Радев за свикувањето на Советот за национална безбедност, каде ги „здруживме силите околу заедничката цел – добрососедството“.

Петков вчера по средбата кај Радев не даде никаква изјава, па денешново видео-обраќање на некој начин е појаснување на неговите ставови за она што се разговарало во петте часа. Тој рече дека се надева дека ќе биде постигнат вистински напредок.

Бугарскиот премиер зборува за „нов почетокот“ на меѓусебните односи. „Во овој нов почеток мора да разговараме за темите важни за двете земји, за правата на Бугарите во Северна Македонија, заедничка инфраструктура, заеднички културен календар, европска интеграција и историја“, додаде Петков во видео обраќањето.

„Заедно можеме повеќе“, рече премиерот, додавајќи дека „владата ќе почне да работи на имплементација на програмата во различни области, а правата на Бугарите во Северна Македонија ќе бидат во центарот на нејзините напори“.

Претставници на бугарскиот дел од историската комисија вечерва, еден ден по состанокот кај Радев, иако ги повторија старите оценки внимателно подипломатски зборуваа за односите меѓу двете земји и за продолжување на работата на комисијата.  Копретседателот на комисија, Ангел Димитров, за бугарската агенција БТА рече дека „задача на комисијата е да анализира дали толкувањето на минатото во учебниците е правилно и да најде начин да ги исправи овие неусогласености со научна анализа и научна презентација на историски материјал во учебник. И уште една главна задача – заедничката комисија да им предложи на двете влади личности и настани за заедничка прослава“, додаде Димитров. Тој вели дека комисијата е заглавена во 10-11 век, „бидејќи се покажа дека нашите колеги се предмет на сложените односи меѓу историјата и политиката во Република Северна Македонија, па затоа нема напредок“.

Запрашан дали е оптимист за интензивирање на дијалогот и развивање билатерални односи Димитров коментира дека на оваа тема не треба да се биде оптимист или песимист, туку да се биде реален. „Така што нема да бидеме непотребно оптимисти, туку да ја чекаме нашата следна средба, која ќе биде на крајот на февруари, и да видиме дали нашите колеги имаат некаква промена во желбата за постигнување резултати“, вели тој.

Димитров и членови од бугарската страна од историската комисија вечерва во Софија беа на претставувањето на фототипното издание на „Зборникот“ на браќата Миладиновци. БТА напиша дека биле „претставени зборникот од 1961 година ‘Бугарски народни песни’ и ‘Собрани дела’“ по повод смртта на браќата Миладиновци.

Друг член од комисијата, Иван Топалов, во изјавата за БТА коментира дека целата вина за застојот е кај македонските историчари. „Сè уште се расправаме со нив дали цар Самуил е бугарски цар или македонски крал. Првата година имаше некакво мало разбирање, по што тие се откажаа од сѐ“, вели Топалов. Тој истакна дека се расправа и за тоа кој е Гоце Делчев. „Во нивните учебници Бугарите се претставени како фашисти, окупатори, варвари, Татари, Монголи. Веќе три години ги убедуваме дека не сме такви и дека мора да си ги сменат учебниците“, додава Топалов. Според него, во Македонија децата од мали нозе ги учеле со јазик на омраза спрема Бугарија. (Н.В.)