Кинотека дел од меѓународниот Erasmus+ проект

Кинотеката е дел од меѓународниот проект „Vintage Home Film and Video Formats for Intercultural Learning (ILMovie)” од програмата Erasmus+, насочен кон унапредување на интеркултурното образование и развојот на вештини преку користење на архивски аудиовизуелни материјали.

Покрај Кинотеката, во проектот „ILMovie“ се вклучени и организации од Бугарија, Албанија и Црна Гора, со цел да се развијат иновативни едукативни ресурси за стручно образование и обука (VET). Главниот фокус на проектот е насочен кон кеативната употреба на винтиџ домашни филмски и видео формати, како што се 8мм и супер 8мм ленти, видеокасети и други формати, како алатки за интеркултурно учење.

Регионот на Западен Балкан се карактеризира со богато мултикултурно наследство и заеднички традиции. Преку користење на архивски домашни филмови и историски аудиовизуелни снимки, проектот ќе ги прикаже секојдневниот живот, обичаите и социјалните искуства на различни заедници, нудејќи уникатна перспектива за разбирање на културната разновидност.

Во рамките на проектот ќе бидат развиени специјализирани наставни модули, едукативни филмови и онлајн платформа за учење (Learning Management System – LMS), наменети за наставници, обучувачи и едукатори во областа на стручното образование. Овие материјали ќе им помогнат на едукаторите полесно да ги интегрираат темите на интеркултурното учење во нивните образовни програми, истовремено промовирајќи културна свест, толеранција и активно граѓанство.

Следствено, еден од главните цели на проектот е и зајакнување на капацитетите на наставниците и обучувачите во стручното образование за олеснување на интеркултурниот дијалог и развој на т.н. „меки вештини“ кај младите. Истражувањата покажуваат дека интеркултурните компетенции – како што се комуникацијата, културната писменост, флексибилноста и толеранцијата – се сè повеќе ценети од работодавачите и играат важна улога во подобрување на можностите за вработување.

Проектот „ILMovie“ ќе вклучи и обуки за обучувачи, развој на отворена и флексибилна дигитална средина за учење, како и продукција на едукативни филмови базирани на дигитализирани архивски материјали. Овие ресурси ќе бидат достапни за центри за стручно образование, архиви, библиотеки и образовни организации во земјава и регионот.

Со поврзување на културното наследство со современи образовни пристапи, проектот има за цел да придонесе за подобрување на квалитетот на стручното образование, зајакнување на интеркултурното разбирање и промоција на европските вредности како што се разновидноста, соработката и активното граѓанство.Учеството на Кинотеката на РС Македонија во проектот „ILMovie“ дополнително ја потврдува нејзината посветеност кон зачувување и промоција на аудиовизуелното наследство, како и неговата едукативна и општествена вредност за идните генерации.