Катругалос: Одлуката на ЕУ за Северна Македонија не е најидеалниот чекор што го очекувавме, но е позитивен

Фактот дека дискусијата во ЕУ за Северна Македонија ќе започне од октомври можеби не е најидеалниот чекор што го очекувавме, но е позитивен, вели министерот за надворешни работи на Грција, Јоргос Катругалос во интервју за „Јуроњуз“ на грчки јазик.

Шефот на грчката дипломатја додава дека во прашање е кредибилитетот на ЕУ и тоа каква порака се испраќа до земјите кандидати за членство во Унијата, јави дописничката на МИА од Атина.

-Многу пати имам нагласено дека е прашање на кредибилитетот на Европската унија да одговори на сите овие важни чекори преземени од Северна Македонија. Бидејќи, каква порака испраќаме до сите земји кои сакаат да се интегрираат во ЕУ, спроведуваат многу тешки внатрешни реформи за да се прилагодат на европското законодавство, а од друга страна се обидуваат на најдобар можен начин да ги решат соседските прашања, како што направи Северна Македонија? Сепак, сметам дека фактот што дискусијата ќе започне од октомври е еден прв чекор. Можеби не е најидеалното што го очекувавме, но е позитивен чекор, вели Катругалос.