Kamçev, Janakieski, Pandeleski dhe Bozhinovski mund të dalin nga paraburgimi, Mijallkov do të presë

Orce Kamçev, Mile Janakieski, Kiril Bozhinovski dhe Cvetan Pandelleski është e mundur të dalin nga paraburgimi sepse Prokuroria Speciale Publike (PSP) te gjykata kompetente ka dërguar mendim pozitiv, gjegjësisht propozon që masa e paraburgimit të zëvendësohet me masë më të lehtë, si paraburgim shtëpiak, transmeton Portalb.mk.

Deri tani Gjykata e Apelit nuk ka sjellë asnjë vendim pas këtyre kërkesave, por është e mundur që kjo të ndodhë gjatë ditës.

Këtë informatë për “Fokus” e kanë konfirmuar nga PSP-ja, nga ku potencojnë se për ish-drejtorin e DSK-së, Sasho Mijallkov, ende nuk kanë dërguar mendim, ndërsa tjerat janë dërguar dje.

Nga atje shpjegojnë se deri tani nuk ka vendim nga Gjykata e Apelit se a do t’i hiqet masa e paraburgimit ndonjërit nga të dyshuarit.

PSP gjatë ditëve në vijim duhet të dërgojë mendim edhe për Mijallkovin, i cili ka dorëzuar garanci prej një milion euro që të dalë nga paraburgimi. Këtë vendim do ta sjellë Këshilli penal i Gjykatës Penale.