Јанева од Шутка испратила писмо до СЈО

Специјалната обвинителка Катица Јанева, која се наоѓа во притвор во истражниот затвор во Шутка испратила писмо-Наредба до Специјалното обвинителство во рок од три дена сите случаи да му ги предаде на Јавното обвинителство, дознава Пресинг ТВ.

Повикувајќи се на нивни извори, Пресинг ТВ пишува дека писмото вчера било добиено во СЈО и веднаш било ставено на разгледување на колегиумот. Во наредбата Јанева бара сите случаи кои се во истражна или во предистражна постапка да му бидат предадени во надлежност на државното обвинителство во рок од три дена. Тоа значи целокупната документација, како и доказите, да се префрлат во ЈО, односно кај Љубомир Јовевски и практично СЈО да го заврши својот мандат.

Рокот на СЈО му истекува на 15 септември и неговата судбина треба да се одреди со нов закон за кој власта и опозцијата подолго време не можат да најдат компромис.

Повеќе медиуми известија дека од СЈО ја потврдија информацијата дека добиле писмо од Јанева.