Израелските истражители летаат за Белград. Ќе го испрашуваат советникот на Вучиќ

Истражители од израелската единица за сериозен криминал Лахав 433 ќе летаат за Србија оваа недела за да го испрашуваат поранешниот висок советник на изборната кампања на премиерот Бенјамин Нетанјаху, според извештаите на израелските медиуми.

Јисраел Ајнхорн ќе биде испрашуван во врска со неговата улога во таканаречената афера Катаргејт и случајот со протекување на документи. Ајнхорн живее во Белград од минатата година, каде што работи како советник на српскиот претседател Александар Вучиќ. Тој не бил во Израел откако беше отворена истрагата за протекувањето на разузнавачки информации.

Ајнхорн, заедно со високиот помошник на премиерот Јонатан Урих и поранешниот портпарол Ели Фелдштајн, е клучен осомничен во случајот со протекување на разузнавачки информации, кој вклучува кражба на класифицирани документи на израелската војска (ИДФ) и нивно доставување до германскиот дневен весник „Билд“.

Се обидел да преговара за да не биде уапсен кога би пристигнал во Израел
Сите тројца се осомничени и во тековната истрага „Катаргејт“, а истражителите се обиделе да го испрашуваат Ајнхорн за неговата работа за Катар преку неговата фирма за односи со јавноста „Перцепција“, која ја водеше заедно со Урих.

Двајцата водеа про-Катарска кампања за да ја прикажат земјата од Персискиот Залив во позитивно светло пред Светското првенство во 2022 година, објавија претходно израелските медиуми.

Ајнхорн се обидел да преговара за да му биде дозволено да се врати во Израел за да сведочи без да биде уапсен, но преговорите не успеале. Според извештаите, потоа побарал да биде испрашуван во Србија, но ова првично било одбиено од обвинителството, кое претпочитало да почека Ајнхорн да се врати во Израел за да го уапси или да покрене постапка за екстрадиција.

Сепак, по очигледната промена на ставот на обвинителите, се очекува истражителите сега да го испрашаат Ајнхорн во Србија.