Изложба на слики и книги на Паскал Гилевски

Во мултимедијалниот културен центар Матица Ексклузив во Скопје денеска напладне ќе биде отворена изложба на слики на академскиот сликар, писател и преведувач Паскал Гилевски, создадени во изминатите шеесет години. По овој повод ќе бидат изложени триесет негови слики и сто и педесет книги преведени на македонски јазик од унгарски, грчки и француски јазик. Изложбата ќе ја отвори Зоран Младеновски, историчар на уметноста.

-Она што претставува особен, своевиден придонес за нашата ликовна сцена, е неговиот неуморен ангажман околу организирањето на изложбите на Друштвото на ликовните уметници на Македонија, како и учеството во афирмацијата на македонската уметност на симпозиумите организирани од страна на АИКА (Меѓународно здружение на ликовни критичари), чиј секретар беше неколку години, се наведува во најавата за изложбата.

Своите знаења и искуства, својот начин на размислување и толкување на ликовниот феномен, Паскал Гилевски ги искажа во есеистичката книга „Толкување на уметноста“, објавена 1977 година, прво издание од таков вид кај нас, во која се обиде од различни аспекти, комплексно, да го осознае и протолкува чинот на уметничкото создавање, натамошниот независен живот и егзистенцијата на едно уметничко дело.

Во 1985 година, на годишната изложба на ДЛУМ, Паскал Гилевски ја доби најзначајната награда за сликарство „Лазар Личеноски“. За неговото творештво пишувале: Гане Тодоровски, Матеја Матевски, Анте Поповски, Луан Старова и други. Тој е добитник и на високото француско одликување „Витез на уметноста и литературата“.