Изградија спектакуларен мост во БиХ: Напукна уште пред да биде пуштен
Мостот кај Почитељ во БиХ, опишан како една од најспектакуларните градби на автопатот што се гради во таа земја на трасата на коридорот V в, напукна веднаш откако беше изграден и ова е само еден од низата проблеми, кои ги доведуваат во прашање прогнозите според кои тој пат треба да биде завршен во следните шест години.
Мостот на Неретва е долг околу еден километар, а изграден е на столбови високи 100 метри и е врска до веќе изградениот дел од автопатот што води од Меѓугорје до Хрватска и се приклучува кон Далмација.
Еден месец по изградбата, медиумите открија дека конструкцијата веќе пукнала
Роковите за изградба на мостот постојано се продолжуваа, па за автопатот на Федерацијата Босна и Херцеговина на почетокот на јули со нескриено задоволство се објави дека поврзувањето на конструкцијата конечно е завршено и сега треба да се изгради само приклучен пат за да може да се пушти во сообраќај од есен.
Директорот на таа компанија, Денис Ласиќ, кој ја презеде функцијата во мај, тоа го опиша како „почеток на поактивен, подинамичен период, во кој целта е да се интензивира изградбата на автопатот во Херцеговина“.
Но, неполн месец подоцна, медиумите открија дека конструкцијата на новоизградениот мост, вреден повеќе од 28 милиони евра и кој сѐ уште не бил пуштен за сообраќај, веќе напукнал. Пукнатините се видливи на долната плоча на мостот меѓу двата столба, а наводно се појавиле при затегнување на каблите што ја држат конструкцијата.
Директорот на автопати ФБиХ: Нема потреба да се вознемирува јавноста
Директорот на автопати ФБиХ потврди дека пишувањата на медиумите се точни, но тврди дека тоа не е голем проблем, односно дека не е загрозена стабилноста на мостот.
„Генерално, нема потреба да се вознемирува јавноста, тоа се работи кои се случуваат, но на изведувачот е навремено да ги реши“, рече Ласиќ.
Но, подоцна порталот „Фокус“ објави дека пукнатините се само еден од проблемите со мостот кај Почитељ, а неговата изградба е најдобра илустрација за видот на невнимание, поврзано со корупцијата, со кое се гради автопатот на коридорот V в .
Го градеа Кинезите и Азербејџанци, кои ангажирале фирма од Широки Брег
За изградба на мостот беа ангажирани кинеските компании Sinohydro Corporation Limited, Powerchina Roadbridge Group Co. и China Gezhouba Group, која заедно со друштвото со ограничена одговорност Azvirt од Азербејџан, ја доби работата во 2019 година како најповолна на јавен тендер.
Тие, пак, набрзо ангажирале подизведувач за најголемиот дел од работата, односно „Херинг“ од Широки Брег, иако немале право на тоа, тврди „Фокус“. Поврзувањето на структурата на мостот беше одложено за повеќе од 200 дена, а Ласиќ на крајот потврди дека кинеските компании „не се снашле добро“ во Босна и Херцеговина.
Кинезите сакале да продолжат со апликации за изградба на преостанатите делници од автопатот, но, како што наведува порталот „Фокус“, повикувајќи се на одлуката за „Автоцест“, им било забрането тоа во период од две години, како и на турскиот компанија Ozaltin lnsaat Ticaret ve Sanayi Anonim Sirketi.
Медиуми: Претходникот на Ласиќ „местел“ тендери
Медиумите претходно објавија дека претходникот на Ласиќ како директор на автопати ФБиХ, Елмедин Володер, за време на неговиот мандат ги „поставил“ работите на изградбата на автопатот за компанијата „Дивел“, која ја водеше со години пред тоа.
Изградбата на автопатот на коридорот V в меѓу Будимпешта и Плоче на делот што минува низ Босна и Херцеговина во должина од околу 330 километри се одвива речиси 30 години, а досега од овој пат се изградени околу 130 километри.
Автопати на Федерацијата БиХ претходно најавија дека целиот коридор треба да профункционира за шест години, со тоа што северната делница до границата со Хрватска кај Свилај би можела да биде завршена до крајот на 2024 година, додека јужната делница од правец од Сараево до Мостар може да се пушти во сообраќај, зависно од динамиката на изградбата на тунелот низ планината Прењ, кој сѐ уште не е ни започнат.