И Шолц го одби рускиот ПЦР тест на ковид

Наместо рускиот тест, Шолц одлучил лекар од германската амбасада да направи ПЦР тест, што е предуслов за влез во Кремљ на средба со рускиот претседател Владимир Путин, велат извори од германската делегација.

Минатата недела и Францускиот претседател Емануел Макрон исто така одби да му биде направен руски ПЦР тест пред средбата со Путин.

Поради ова одбивање разговорите на Макрон и Путин се одржаа на маса долга шест метри за да се одржи драстична физичка дистанца.

На прес-конференција по средбата, Пути и Макрон застанаа неколку метри подалеку. Шолц е последниот во серијата западни шефови на држави и влади вклучени во силна дипломатска офанзива за спречување војна, а мисијата е чувствителна затоа што Германија е најголемиот трговски партнер на Русија во Европа.

Се очекува средбата во Кремљ да трае неколку часа, а на крајот ќе се одржи и заедничка прес-конференција.

Посетата доаѓа во време кога германско-руските односи се на најниско ниво. Украинската криза најверојатно ќе засени неколку нерешени билатерални проблеми меѓу Берлин и Москва.

Шолц ја предупреди Русија да не ја напаѓа Украина и нагласи дека ЕУ и САД се подготвени да одговорат со воведување остри економски санкции кон  Русија .