„Хорор сценарио“: Бербок ја предупреди Кина за војна околу Тајван

Германската министерка за надворешни работи Аналена Бербок во петокот ја предупреди Кина да ги деескалира тензиите околу Тајван, предупредувајќи дека војната во регионот ќе има катастрофални последици за целиот свет.

Забелешките на „тешкашот“ на германската партија Зелени, исто така, го повторуваат значителното дистанцирање на Берлин од спорните забелешки на францускиот претседател Емануел Макрон, кои фрлаат сомнеж околу тоа дали Европа ќе им помогне на САД доколку Пекинг го нападне помалиот демократски сосед.

„Воена ескалација во Тајванскиот теснец, низ кој тече 50 отсто од светската трговија секој ден, би било хорор сценарио за целиот свет“, рече Бербок на заедничката прес-конференција со нејзиниот кинески колега Чин Ганг во Пекинг.

„Шоковиот бран на ваква светска економска криза ќе ги погоди и Кина и Германија како посебни трговски нации. Затоа со голема загриженост ги следиме зголемените тензии во Тајванскиот теснец“, рече шефот на германската дипломатија.

„Конфликтите можат да се решат само по мирен пат. Еднострана и насилна промена на статус-квото не би била прифатлива за нас како Европејци“, додаде таа.

Забелешките на Бербок доаѓаат во време на зголемени тензии во Тајванскиот теснец, каде кинеските сили претходно овој месец изведоа тридневна воена вежба – вклучително и лажна блокада на Тајван, за кој Кина тврди дека е дел од нејзината територија.

Кинескиот министер за надворешни работи Чин, сепак, им рече на новинарите на прес-конференцијата дека „Тајван е кинески Тајван“, пред да додаде: „Сограѓаните од двете страни на теснецот сакаат национално единство. Тоа е нашиот основен интерес“, се вели во официјалниот превод.

Макрон предизвика бес минатата недела, откако во интервју за „Политико“ рече дека Европа не треба да биде „следбеник“ на Соединетите Држави, сугерирајќи дека Европа не треба да се навлекува на конфликти што не се нејзина грижа.

Шефот за надворешна политика на ЕУ, Жозеп Борел, кој требаше да отпатува во Пекинг оваа недела на разговори, но беше принуден да го откаже своето патување откако беше позитивен на тестот за Ковид-19, на сличен начин повика на воздржаност за прашањето на Тајван.

„Мораме да ја намалиме тензијата; да избегнуваме вербални испади или провокации кои можат само да ја поттикнат недовербата“, рече Борел доцна во четвртокот.

Позицијата на ЕУ за Тајван е „конзистентна и јасна“ и „не е променета“, додаде тој, велејќи дека блокот „останува фундаментално посветен на политиката на ЕУ за една Кина“, која ја признава кинеската влада како „единствена легална влада на Кина“, додека ги развива областите на соработка со Тајван.

Борел и Бербок го повикаа Пекинг, кој се обиде да се позиционира како посредник меѓу Киев и Москва во врска со руската војна против Украина, да ги продолжи своите мировни напори – под одредени услови.