Гутереш: Да се преземат неопходните мерки во борбата против сите облици на екстремизам

– Мораме да бидеме почувствителни на сите облици на екстремизам, за да не се соочиме со страшното лице на насилниот екстремизам, рече Гутереш во говор во Виена по повод 40-годишнината од канцеларијата на ОН во тој град.

Тој истакна дека Обединетите нации 75 години работат за зачувување на мирот во светот и за спречување на насилство, но сé уште не ги постигнале очекуваните резултати.

Гутереш нагласи дека, покрај тероризмот и насилството, климатските промени се уште едно многу важно прашање што го загрозува целиот свет и ги повика сите земји да ги преземат неопходните мерки пред да биде предоцна.

ОН е основана во 1945 година, а нејзините главни задачи се одржување на мирот и безбедноста во светот, развивање на добрососедски односи, економската соработка, ширењето толеранција и промовирање на почитувањето на човековите права и основните слободи на човекот.

Пред официјалната програма во канцеларијата на ОН во Виена, Гутереш се сретна и со австрискиот претседател Александер Ван дер Белен.