Грузија победи на детскиот Евросонг во Мадрид, Македонија претпоследна

22-то издание на Детската Евровизија се емитуваше викендов во живо од Мадрид, Шпанија.

На овогодинешното издание се натпреваруваа 17 земји, а Андрија Путкарадзе од Грузија беше прогласен за победник на Детската Евровизија 2024 година со песната „To My Mom“.

Ова е четврти пат Грузија да победи на Детската Евровизија.

Во живо од Каха Магика во Мадрид, овогодинешната Јуниорска Евровизија ја водеа Рут Лоренцо, Марк Клотет и Мелани Гарсија.

Андрија Путкарадзе од Грузија беше крунисан за победник врз основа на гласањето од националните жирија во сите 17 земји во конкуренција.

По осми пат, гледачите од целиот свет можеа да гласаат за нивните омилени песни во два прозорци: онлајн гласање пред шоуто, каде што гласањето се засноваше на делови од пробите и онлајн гласање за време на шоуто, каде што гледачите можеа да гласаат за време на 15 минути по последниот настап.

Националното жири и онлајн гласањето утврдија по 50% од резултатот.

Македонските претставници Ана и Алексеј со композицијата „Маратон“, дело на Лазар и Магдалена Цветкоски, настапија како седми, а завршија претпоследни.

Уште во 2000 година, радиодифузерот Данско радио (ДР) одржа натпревар за песна за деца, а во 2002 година „МГП нордискиот“ се одржа заедно со Шведска и Норвешка. ЕБУ ја презеде идејата за натпревар за песна на кој учествуваат деца, а првиот натпревар за песна на детската Евровизија се одржа во 2003 година во Копенхаген, со 16 земји-учеснички.

Тогаш, Детската Евровизија се засноваше на забава за деца низ Европа – на нивно ниво. Оттогаш се трансформираше во копија на „Евровизијата за возрасни“.

Детската Евровизија е отворена само за деца на возраст од 9 до 14 години. (ЕБУ)