Грција не му дозволи на Јоргос Лантимос да снима на Акропол

Одбиено е  барањето на славниот режисер, грчкиот Оскаровец Јоргос Лантимос, дел од новиот филм „Бугоња“ да го снима на Акропол, пишуваат грчките медиуми. Во соопштение од Централниот совет за археологија, највисокото тело во државата за сите прашања кои се однесуваат на заштита на древни споменици и археолошки локалитети, се вели дека сцените од филмот „не се конзистентни со вредностите на Акропол“ и се препорачува барање друга локација. 

Сцената за којашто станува збор прикажува куп мртви луѓе на Акропол, помеѓу нив и десетици тренирани (?) мачки. 

„Бугоња“ е американски римејк на мрачната научно-фантастичка корејска комедија, „Спасете ја зелената планета“. Основната приказна е тоа што главниот лик киднапира маж (во случајов ќе биде жена), извршен директор на голема компанија, верувајќи дека тој е вонземјанин кој е дојден на нашата планета за да ја уништи. Џеси Племонс ќе го игра конспираторот, кој е истовремено и пчелар.

Лантимос е препознатлив по филмот „Кутрите“ (Poor Things) кој во 2023 година го освои Златниот лав на јубилејното 80-то издание на Филмскиот фестивал во Венеција.

Филмот, со Ема Стоун, Вилем Дефо и Марк Рафало, е црна комедија според истоимениот роман на шкотскиот писател Аласдир Греј од 1992, а беше главен фаворит и на критиката и на публиката во текот на целиот фестивал.

Грција, во 2021 година, дозволи фотографирање на неколку големи археолошки споменици, вклучително и Акрополот – за француската луксузна модна куќа „Диор“.

„Нема да има модна ревија на Акропол“, соопштуваат властите.

Фотосесијата се одржа во Одеон на Херод Атикус, подножјето на Акропол, Агора, Храмот на Посејдон на ’ртот Сунион близу Атина и Храмот на Зевс во Немеја. 

 

 

Овој настан на „Диор“ за 2022 година беше во чест на легендарната сесија кај Акрополот од пред 70 години кога беа претставени модните фустани на Кристијан Диор.