Грција ќе прави струја од морето

Грчкото Министерство за животна средина и енергија се очекува да го финализира нацрт-законот што го отвора патот за изградба на пловечки ветерни електрани низ целата земја.

Грција се надева дека ќе донесе законска регулатива во парламентот во наредниот период со цел да објави тендери за пилот проекти во 2026 година. Инвеститорите веќе пројавуваат интерес.

Грчката влада има за цел да испорача најмалку 2 GW офшор капацитет од ветерна енергија до 2030 година како дел од нејзиниот Национален план за енергија и клима. Проектите, велат упатените на пазарот, ќе ја позиционираат Грција на чело на развојот на обновливите извори на енергија, ќе ја подобрат енергетската безбедност, ќе создадат зелени работни места и ќе ја забрзаат транзицијата на Грција кон нето нула емисии на јаглерод.

Врз основа на наодите на Фондацијата за економски и индустриски истражувања (IOBE), инсталирањето на офшор ветерни електрани може да го зголеми БДП на земјата до 1,9 милијарди евра годишно во периодот 2024-2050 година и да генерира до 440 милиони евра приходи годишно.

Морските области на Крит, Кикладите, Атика, Додеканезите и Тракија се според првичните планови за периодот 2025-2034 година и по истражувањето и идентификацијата меѓу најпогодните области за инсталирање на пловечки ветерни електрани. Областите за среднорочната развојна фаза кои ќе бидат домаќини на 1,9 GW проекти во 2030 година врз основа на ревидираниот климатски план, се лоцирани во источен Крит (Агиос Николаос), јужен Родос, централно Егејско Море (Острови Донуса, Ѓарос), Евија (Агиои Апостоли) и Јонското Море. Првите проекти треба да мобилизираат 6 милијарди евра инвестиции кои се очекува да достигнат над 28 милијарди евра до 2050 година.

Локалните заедници, засегнатите страни во туризмот, еколошките групи и општинските власти ширум земјата реагираа на веста и презедоа активности за запирање на создавањето на огромни морски ветерни паркови. (То Вима)