Градоначалникот на Гази Баба и се заканува на Тренчевска со суд за одземената градинка

„Скандалозно и несериозно е тоа што Министерството за труд и социјална политика, преку соопштение до медиумите не извести дека ни ги одзема надлежностите за детската градинка Детска радост во Автокоманда“, вели градоначалникот на општина Гази Баба, Бобан Стефковски.

„Ваквата постапка е уште еден јасен доказ дека Министерството за труд и социјална политика води политички, а не законски постапки. До овој момент во општина Гази Баба не е пристигнат документ со кој ни се одземаат надлежностите, а Министерството во соопштение до јавноста во петтиот пасус вели: Одземените надлежности на градоначалникот се реазултат на прекршување на законот од страна на управниот одбор на ЈОУГД Детска радост – Гази Баба и на прекршување на законот од страна на градоначалникот Бобан Стефковски, при водење на постапка за разрешување на директор”.

Откако не им успеа притисокот кој го правеа врз мене за да ја поништам одлуката за разрешување и да ја вратам на работа разрешената директорка, тргнаа низ насилна постапка да ги одземаат надлежностите.

Компромис со незаконското работење нема да правам, а на министерката Јованка Тренчевска и порачувам дека за сите незаконски постапки и донесени решенија ќе има ревизија, а потоа и одговорност пред надлежните органи во Република Македонија!

Се надевам дека Министерството за труд и социјала политика ќе се приклучи на постапките кои општина Гази Баба ги иницираше до Основното јавно обвинителство и Државната комисија за спречување на корупција за утврдените прекршувања на Законот со извршената ревизија“, додава градоначалникот на општина Гази Баб, Бобан Стефковски.

Претходно, Министерството за труд и социјална политика ги демантираше тврдењата на Стефковски дека се врши притисок врз вработените  да ја донесат одлуката за  одземање на ингеренциите  во градинката  „Детска радост“.

„ Ниту еден вработен во Министерството за труд и социјална политика кој е поврзан со инспекциски надзор, ниту одговорен во делот на детска заштита не користи боледување во овој момент.“, стои во реакцијата. Исто така институцијата посочува дека вработените се докажани професионалци во својата област,  без никакви особини да потклекнуваат на притисоци од било која страна, посебно не од страна на министерката која е нивна долгогодишна колешка.

„Сите акти кои ги носи Министерството за труд и социјална политика се поткрепени со закон, додека политичката борба и политиканство на грбот на децата и детската заштита води токму градоначалникот, на општина Гази Баба, Бобан Стефковски.  Одземените надлежности на градоначалникот се резултат  на прекршување на законот од страна на управниот одбор на ЈОУГД  „Детска радост“ – Гази Баба и на прекршување на законот од страна на градоначалникот, Бобан Стефковски,  при водење постапка за разрешување на директор.

Министерството за труд и социјална политика апелира градоначалникот Бобан Стефковски да прекине да шири лажни вести и дезинформации и при тоа да создава конфузија и немир помеѓу родителите на децата кои се згрижени во ЈОУГД  „Детска радост“, а сето тоа за ситни политички поени, по што и е препознатлив“, стои во реакцијата на МТСП.