„Градации“: Камерна изложба на Билјана Билбилоска

На 31 мај 2025 година, во фоајето на Зелениот покрив во ЈУ Дом на култура „Кочо Рацин“ Скопје, беше отворена камерна изложба на Билјана Билбилоска, со наслов „Градации“. Куратор на изложбата е Виолета Калиќ, историчар на уметност.
Авторката се претстави со експериментални графики, работени изминативе години.
Фокусот на овој циклус е на градацијата на линијата, како и варијабилноста на нејзината вредност. Декоративните ситуации се протегаат во рамките на нивните умерени граници и остануваат на ниво на орнаментација. Црната боја е мека и патинирана.
Цртежот е слободен и неоптоварен, а во исто време е анатомија и скелет на графиката, како и носечки столб на композицијата. Графиката ги претставува основните комуникации и интеракциите на просторот со линијата.

Базичниот црно-бел тоналитет во делата се комбинира и вмрежува во секојдневието на ахроматскиот сликовен свет до своите максимални изразни можности.

Билјана Билбилоска дипломирала и магистрирала на Факултетот за ликовни уметности при Универзитетот Св. Кирил и Методиј во Скопје. Реализирала 13 самостојни изложби во земјава и надвор од неа, а зад себе има 50 групни претставувања. Остварила студиски престој во Париз во Cite Internationale Des Arts, како и резиденцијален престој во Монферато, Италија.