Град Скопје обвинува за „коалиција СДСМ и ВМРО и ДПМНЕ“

Жалиме што се уште постојат луѓе кои мислат дека илјада пати кажана лага ќе стане вистина, но политичката реалност во Македонија креирана од коалицијата СДСМ-ДПМНЕ единствено се базира на лаги и измислици. Градот Скопје ниту е блокиран ниту е во банкрот. Редовно се сервисираат тековните обврски, а без пречка се реализираат сите проекти.

Градот Скопје е единствена институција во Македонија која работи со позитивни резултати и покрај политичките и институционалните обврски. Меѓу останатото сме единствена институција која прва линеарно ги зголеми платите.

Васко Кичевски може да го смета ова соопштение како демант, да се извини во законскиот рок и да го повлече кажаното, во спротивно вистината ќе треба да ја докаже на суд.

Претходно Васко Кичевски, претседател на Градска Организација СДСМ – Скопје, изјави дека хаосот во Град Скопје од ден на ден е се поголем, а виновници за таквата состојба се градоначалничката Данела Арсовска и ВМРО-ДПМНЕ, партијата што има мнозинство во Советот и во управните одбори на градските јавни претпријатија.

-Поради нивната неспособност, Град Скопје е со блокирана сметка и се наоѓа пред банкрот.

И додека ВМРО-ДПМНЕ го игнорира овој проблем и не закажува вонредна седница на Советот, банкротот што доаѓа ќе значи и целосен распад на градот.

Многу извесно е дека во текот на летото ќе видиме како дел од јавните претпријатија доцнат со исплата на платите, а дел од нив воопшто нема да можат да исплатат плати на своите вработени.

За потсетување, градот Скопје и институциите во негова надлежност веќе доцнат со исплати кон добавувачите, но се очекува ситуацијата целосно да излезе од контрола и да следуваат низа тужби сѐ со цел да си ги наплатат средствата што јавните претпријатија ги должат.

Како последица од сето тоа ќе бидеме сведоци на се полоши услуги што овие јавни претпријатија ги даваат, градот ќе станува се позапустен и понечист.

Глетката на преполни и со денови неисчистени контејнери ќе биде секојдневие, но не затоа што немаат возила или луѓе,  туку заради тоа што нема да имаат средства да набават нафта.

Доцнењето на автобусите нема да биде главен проблем, туку вистинското прашање ќе биде дали воопшто ќе има автобуси по улиците, затоа што ЈСП веќе е доведено пред колапс, долгот кон дел од добавувачите надминува десетици милиони евра, но кога за краток период нема да може да исплати ниту плати на вработените најверојатно ќе се повтори штрајкот на вработените во ЈСП.

ВМРО ДПМНЕ и Данела Арсовска исполнија едно ветување од програмата, мостот на кој што стоиме денеска да биде наменет за рибарење, а за сметка на тоа скопјани со часови се заглавени во сообраќајниот метеж кој дополнително се создаде поради пожарот на мостот Беласица.Сето ова почитувани е последица на неодговорното и расипничко дејствување на ВМРО-ДПМНЕ и Данела Арсовска, порача тој.