Големо невреме во Австралија- загина жена, 120.000 луѓе останаа без струја

Една жена загина, а повеќе од 120.000 жители се без струја по силните ветрови и силниот дожд што ја зафатија Јужна Австралија, соопштија денеска властите.

Голема штета е забележана во сојузните држави Викторија и Тасманија, при што една 63-годишна жена загинала откако дрво паднало врз кабина во туристички парк на границата меѓу Викторија и Нов Јужен Велс, соопштија службите за итни случаи.

„Тоа е тажен и трагичен збир на околности за семејството на жената и моите мисли и сочувство се упатуваат кон неа и до службите за итни случаи кои реагираа на инцидентот“, рече на прес-конференцијата викторијанската премиерка Џасинта Алан.

Државната служба за итни случаи на Викторија примила повеќе од 2.800 повици во текот на ноќта, главно на соборени дрвја и оштетувања на згради, додаде премиерот.

#Melbourne #melbourneweather pic.twitter.com/ZGxuLWEYUg

— K✨ (@epsbsp) September 1, 2024

Повеќе од 120.000 жители сè уште се без струја во понеделникот, рече Алан, за разлика од дури 180.000 кои беа без струја во раните утрински часови.

Ветерот дуваше со брзина од 150 км/ч
Метеоролошките предупредувања остануваат на сила за поголемиот дел од југоисточниот брег на државата, бидејќи ветровите дувале до скоро 150 километри на час во текот на ноќта.

Владата на државата Викторија во понеделникот ги советуваше луѓето да ги избегнуваат крајбрежните области поради опасните бранови, нестабилното тло во областите на карпите и поплавите во ниските области. И јужната островска држава Тасманија беше погодена од невремето, а илјадници останаа без струја во неделата.

„Тоа беше уште една бура низ државата со многу разурнувања“, рече Мик Лоу, извршен директор на државната служба за вонредни состојби на Тасманија, на прес-конференција во понеделникот.

Невремето низ јужниот дел на земјата следеше по неколкудневните невообичаено високи зимски температури од речиси 30 степени Целзиусови во Сиднеј.