Големите европски компании ветија поголеми инвестиции во ЕУ

Врвните раководители на 28 од најголемите европски компании ветија во среда дека ќе ги зголемат своите инвестиции во Европа за просечно 50 проценти до 2030 година, под услов креаторите на политиките на Европската унија (ЕУ) да спроведат реформи за зајакнување на конкурентноста и безбедноста на блокот.

Обврската беше презентирана во Конфедерацијата на данската индустрија (DI) во Копенхаген на претседателката на Европската комисија Урсула фон дер Лајен, францускиот претседател Емануел Макрон, полскиот премиер Доналд Туск и данската премиерка Мета Фредериксен.

Во заедничка декларација наречена „Обврска од Копенхаген“, компаниите изјавија дека се подготвени да инвестираат повеќе во Европа доколку се подобри регулаторната и финансиската средина, повикувајќи на поедноставни правила и известување, посилни рамки за иновации и инвестиции, подобрена инфраструктура, „праведна“ зелена транзиција и мерки за зајакнување на безбедноста.

Во декларацијата се наведува дека 28-те фирми заедно претставуваат приходи од приближно 700 милијарди евра (821 милијарда американски долари) и дека целосното зголемување од 50 проценти ќе зависи од промените во политиката.

Извршниот директор на DI, Ларс Сандал Соренсен, изјави дека е „историско“ што европските бизнис лидери се сретнаа со врвни политичари за да се договорат за чекорите за „враќање на Европа на победничкиот курс“, додавајќи дека бизнис лидерите се „подготвени“ и ги повикаа политичките лидери да покажат решителност.

Компаниите што изразија поддршка вклучуваат Ново Нордиск, Сименс, Ербас, Талес, Сааб, Данфос, Конгсберг, ТисенКруп, САП, Карлсберг и Маерск, според DI.

Објавата дојде откако лидерите на ЕУ се состанаа во Копенхаген на неформален состанок на шефови на држави и влади во среда, како и на самит на Европската политичка заедница (ЕПЦ) во четврток, објави кинеската новинска агенција Ксинхуа.