Голема бура ја погоди Словенија: Пристигнуваат драматични снимки од поплавени куќи и патишта

Делови од Словенија се поплавени поради ненадејни и обилни врнежи од дожд кои не престануваат од утринските часови.

Југозападниот дел од Приморје Словенија, долж границата со Хрватска, е погоден од бура – вода се излева по улиците, куќите се поплавени, а сообраќајот е прекинат на одредени места.

Врнежите траеја цела утро, а реките Драгоња и Бадашевица се излеаја од своите корита. Надлежните служби предупредија дека врнежите ќе продолжат денес и утре попладне, и дека може да има брзо зголемување на поројните води, објавува 24ur.

Метеоинфо објави дека неколку патишта и згради се поплавени и дека се случиле лизгања на земјиштето. На места паднале повеќе од 150 мм дожд, а условите на теренот се исклучително опасни, предупредија тие.

Невремето оштети неколку патишта во областа Копер, се случи лизгање на земјиштето пред тунелот Декани од правец на Чрни Кал кон автопатот, а пожарникарите регистрираа приближно 70 инциденти поврзани со невремето во областа до 10 часот наутро.

Општина Копер им советуваше на жителите да ги отстранат своите возила од ниските подрачја и паркинзите (паркингот на пазарот) и им обезбеди бесплатен паркинг во неколку гаражи.

Невремето ја погоди и Хрватска

Силен дожд придружен со грмотевици падна денес попладне во областа на Загреб. Ова е во согласност со прогнозите на Државниот хидрометеоролошки завод, од каде најавија поизразени врнежи од дожд со грмотевици придружени со силни налети на ветрови за денес.

Црвен метеоролошки аларм е издаден за три хрватски региони во петок попладне: најопасно ќе биде во регионите Книн, Риека и Сплит.

Остатокот од земјата е ставен под портокалов метеоролошки аларм поради можноста за грмотевици и силни ветрови.