Голем американски авион слета на аеродром во Москва

Авион C-17A Globemaster III TRANSPORT на американските воздухопловни сили слета утрово на московскиот аеродром „Внуково“. Авионот полета од Рига, Латвија, а американските воени и владини претставници не ја објавија причината за летот, пишува Дифенс блог.

Според услугата Flightradar24, авионот со повикувачки знак REACH4555 и регистрација 07-7181 полета од Рига околу 8,50 часот по московско време. Тој слета во Русија малку по 10 часот. Податоците ги објави и рускиот медиум РБК. Објавените патеки на летот покажуваат дека авионот ги преминал Латвија и Литванија пред да влезе во рускиот воздушен простор и да слета на Внуково.

Корисниците на платформата Икс кои ги следат летовите првично се сомневаа во точноста на податоците, бидејќи забележаа недоследности во автоматското следење на позицијата. Сепак, профилот „Кофи рипорт“ подоцна објави дека позицијата на авионот е потврдена преку ACARS порака и дека Flightradar24 го снимил целиот пристап и слетување.

Американското воздухопловство и Министерството за војна не објавија официјални информации за целта или дестинацијата на летот. Истиот профил, „Кофи рипорт“, се повикува на неименувани извори од Икс и наведува дека станува збор за мисија означена како „поддршка на SECDEF“. Таквиот код обично значи дека летот е поврзан со патување на раководството на военото министерство или за логистичка поддршка, но оваа информација не е независно потврдена.

Податоците анализирани од „Брит бриф“ откриваат дека патувањето на авионот започнало на 22 август во САД. Прво полетал од воздухопловната база „Мекгваер-Дикс-Лејкхарст“ во Њу Џерси до воздухопловната база „Чарлстон“ во Јужна Каролина. Еден ден подоцна, тој продолжил од Чарлстон до воздухопловната база „Ендрус“ во Мериленд, од каде што полетал за Рига.

Аеродромот „Внуково“, трет најпрометен во Русија, повремено прима дипломатски и воени летови за време на војната во Украина. И покрај ова, директните летови на американски воени авиони на руска територија се многу ретки од почетокот на војната во 2022 година.

Слетувањето на американски воен авион во Москва привлече големо внимание на социјалните медиуми, со оглед на состојбата на воените односи меѓу САД и Русија. Контекстот на посетата, сепак, останува непознат. „Ц-17“ е тежок транспортен авион кој се користи за превоз на товар и војници, но и за дипломатски мисии или превоз на високи функционери. Ниту американските ниту руските претставници не објавија информации за причината за летот, патниците во авионот или времетраењето на неговиот престој на аеродромот Внуково.