Германскиот амбасадор во Софија: Бугарија и Македонија не се во билатерален спор

„Францускиот предлог“ за Северна Македонија, кој предвидува вклучување на Бугарите во уставот на земјата, нема да биде репреговаран, изјави денеска германската амбасадорка во Софија, Ирене Марија Планк.

Во поткастот на телевизијата БНТ, таа коментираше дека „овој договор е резултат на унифициран консензус на сите земји од ЕУ и тој е основа Северна Македонија да започне преговори за членство во Унијата“.

„Ова не е билатерално прашање, како што често слушаме. Ова е ставот на 27-те членки на ЕУ“, рече амбасадорот Планк.

Премиерот Христијан Мицкоски и претседателката Гордана Сиљановска-Давкова, како и други македонски функционери постојано тврдат дека патот на Скопје кон ЕУ е блокиран поради билатералните проблеми со Софија.

Амбасадорката Планк рече дека Берлин не е подготвен повторно да преговара за таканаречениот „француски предлог“.

„Не. Верувајте ми, ако имаше нешто такво, ќе знаев.“

Германската амбасадорка во Бугарија, Ирене Марија Планк, истакна дека владеењето на правото е исклучително важен аспект во преговорите за членство на Северна Македонија во ЕУ.

Другата важна точка во овој процес е дека договорите мора да се почитуваат и спроведуваат.

Во врска со темата за изградбата на Коридорот 8 и неговото регионално значење на Балканот, Планк коментираше дека „неговата изградба не напредува на начин на кој би сакале“.

„Мицкоски треба да знае дека Македонија не може да зема средства од Коридорот 8 и да ги пренасочува кон изградбата на Коридорот 10 и поврзувањето меѓу Северна Македонија и Србија“, рече Планк.

Но таа во разговорот за БНТ рече дека сè уште е оптимист во врска со изградбата на Коридорот 8 по состанокот на министрите за транспорт на Бугарија и Северна Македонија што се одржа во Истанбул.

„Потоа, она што го слушам е дека успеале да најдат решение во врска со преговорите за изградбата на тунелот на границата меѓу вашите две земји.“

Според неа, изградбата на објектот е важна не само за подобра поврзаност, туку е важна и за стабилноста во Украина.

„Овој коридор е многу важен за Украина во контекст на руската инвазија“, истакна дипломатот.

Оваа недела таа се најде во центарот на вниманието откако присуствуваше на еден од протестите во Софија предизвикани од апсењето на опозицискиот градоначалник на Варна (член на Продолжуваме со промената), што доведе до многу остра реакција од бугарското Министерство за надворешни работи.